"އާތް އަވަރ" ފާހަގަކުރުމުގެ ޙަރަކާތްތައް ރާއްޖޭގައި ފެށިއްޖެ

މިއަހަރުގެ "އާތް އަވަރ" ފާހަގަކުރުމުގެ ޙަރަކާތްތައް ރާއްޖޭގައި ފެށިއްޖެއެވެ.

މި ޙަރަކާތްތައް ރާއްޖޭގައި ކުރިއަށްދާނީ މިރޭ 8:30 އިން 9:30 އަށެވެ.

"އާރތް އަވަރ" އަކީ ދުނިޔެ ހޫނުވުމާއި ތިމާވެއްޓަށް އަންނަމުންދާ ބަދަލުތަކާއިމެދު މީހުންގެ މެދުގައި ހޭލުންތެރިކަން އިތުރުކުރުމުގެ ގޮތުން ދުނިޔޭގެ ސަތޭކަ ހަތްދިހައަށްވުރެ ގިނަ ޤައުމުން ބައިވެރިވާ ޚާއްސަ ޙަރަކާތެކެވެ.

އާރތު އަވަރ ފުރަތަމަ ފާހަގަކުރަން ފަށާފައިވަނީ ދެހާސް ހަތްވަނަ އަހަރު އޮސްޓްރޭލިއާގެ ސިޑްނީގައެވެ. މިހާރު މިހަރަކާތް މިވަނީ ދުނިޔޭގެ ފެންވަރުގައި ފާހަގަކުރާ ބައިނަލްއަޤްވާމީ ކެންޕޭނަކަށްވެފައެވެ. މިއަހަރަކީ މެދުނުކެނޑި އަރތް އަވަރ ފާހަގަ ކުރަމުން އަންނަތާ ދިހަވަނަ އަހަރެވެ.

ވާރލްޑް ވައިޑް ފަންޑުން އިންތިޒާމްކުރާ އަރތު އަވަރ މިކެމްޕެއިނަކީ ޖައްވު ހޫނުވުމުގެ ސަބަބުން ދިމާވާ ތިމާވެށީގެ މައްސަލަތަކަށް ލުޔެއް ހޯދުމަށް ފަރުދީ ފެންވަރުގައި މަސައްކަތް ކުރުމަށް ހިއްވަރުދިނުމާ، ޢަމަލީގޮތުން މިކަމުގައި ބައިވެރިވުމަށް އެންމެންނަށް ލިބިގެންދާ ފުރުޞަތެކެވެ.

މިދިޔަ އަހަރުގެ އާރތު އަވަރ ޙަރަކާތުގައި 178 ޤައުމަކުން ބައިވެރިވެފައިވެއެވެ. މިއާއެކު މިދިޔަ އަހަރުގެ އަރތު އަވަރގައި ބައިވެރިވެފައިވާ މީހުންގެ އަދަދު މިލިއަނުން ގުނާލެވެއެވެ.

އަރތު އަވަރގެ ހަރަކާތް ކުރިއަށްގެންދަނީ ކަރަންޓް ބޭނުންކޮށްގެން ކޮންމެހެން ދިއްލަންޖެހޭ ބޮކި، ހޮޅިބުރިފަދަ ތަކެތިފިޔަވައި އެހެން ހުރިހާ ބޮތްކަކާއި ހޮޅިބުރިތައް ކަނޑައެޅޭ އެއްގަޑިއިރަށް ނިއްވާލައިގެންނެވެ. މިކަމުގެ ބޭނުމަކީ، ކަރަންޓް ބޭނުންކުރެވޭ މިންވަރު ދަށްކޮށް، އެކަމަށްޓަކައި އަންދާ ތެލުގެ މިންވަރުވެސް މަދުކޮށް، ތެޔޮ އެންދުމުން ޖައްވަށް ބޭރުކުރެވޭ ވިހަ ދުންތައް މަދުކުރުމެވެ.

އަރތް އަވަރ ފާހަގަކުރުމަށް ކުރިއަށްގެންދާ މައިގަނޑު ޙަރަކާތްކަމަށްވާ، ކަރަންޓް ބޭނުންކޮށްގެން ދިއްލާ، ދިއްލުންތައް އެއްގަޑިއިރަށް ނިއްވުމަށް ބާއްވާ ޙަރަކާތް ހުރިހާ ޤައުމުތަކެއްގައިވެސް ކުރިއަށްގެންދަނީ އެ ޤައުމެއްގެ ގަޑިން ރޭގަނޑު އަށްގަޑި ތިރީހުން ނުވަގަޑި ތިރީހަށެވެ. މިއަހަރުގެ އަރތު އަވަރ ފެށިގެންދާނީ ޖީއެމްޓީ ގަޑިން މާރޗުމަހުގެ ފަންސަވީސްވަނަ ދުވަހު ހަގަޑި ތިރީހުގައި ސަމޯއާއިން އަދި މި ޙަރަކާތް ނިމިގެންދާނީ ޖީއެމްޓީ ގަޑިން މާރޗުމަހުގެ ސައްބީސްވަނަ ދުވަހު ހަތްގަޑި ތިރީހުގައި ކުކް އައިލެންޑްސްއިންނެވެ.

މިއަހަރުގެ އަރތު އަވަރއާ ގުޅިގެން ބޮކިތައް ނިއްވާލުމަށް ހަމަޖެހިފައިވާ ދުނިޔޭގެ މައްޝޫރު ބިނާތަކުގެ ތެރޭގައި، ފްރާންސްގެ ޕްރިސްގައި ހުންނަ އައިފްލް ޓަވަރ، ލަންޑަން އައި، ސިންގަޕޫރުގެ މެރީނާ ބޭ ސޭންޑްސް، މިސްރުގެ ޕިރަމިޑުތަކާއި، ސިޑްނީގެ އޮޕޭރާ ހައުސް، ހޮންގް ކޮންގުގެ ވިކްޓޯރިއާ ހާރބަރ ހިމެނެއެވެ.

އާރތް އަވަރ ފާހަގަކުރަނީ ކޮންމެ އަހަރެއްގެވެސް މާރޗް މަހުގެ އެންމެފަހު ހޮނިހިރު ދުވަހުއެވެ.