މިއަހަރުގެ ކުންމިންގ ފެއަރގައިވެސް ދިވެހި އުފެއްދުންތަކަށް ބޮޑު ތަރުހީބެއް ލިބިގެންދިޔަ ކަމަށް އިކޮނޮމިކް މިނިސްޓްރީން ހާމަކޮށްފިއެވެ.
މި މަހުގެ ބާރައިން އަށާރައަށް ޗައިނާގެ ޔުނާން ޕްރޮވިންސްގެ ކުންމިންގައި ކުރިއަށްދިޔަ ޗައިނާ ކުންމިންގ އިމްޕޯޓް އެންޑް އެކްސްޕޯޓް ފެއަރ ނުވަތަ ކުންމިންގ ފެއަރގައި އިކޮނޮމިކް މިނިސްޓްރީއާ އެކު ރާއްޖޭގެ 4 ކުންފުންޏަކުން ބައިވެރިވިއެވެ.
ކުންމިންގް ފެއަރގެ ކާމިޔާބީއާ ގުޅޭގޮތުން މަޢުލޫމާތުދެއްވުމަށް އިކޮނޮމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި އެ މިނިސްޓްރީގެ ޑެޕިއުޓީ މިނިސްޓަރ އާދަމް ތައުފީގު ވިދާޅުވީ، ދިވެހި މަސްދަޅާއި ރާއްޖޭގެ ސްވެނިއަރއަށް މި ފެއަރގައި ބޮޑު ތަރުހީބެއް ލިބުނު ކަމަށެވެ.
ދިވެހިރާއްޖޭގެ ފަރާތުން މި ފެއަރގައި ބައިވެރިވި ވިޔަފާރިވެރިންނަށް، މި ފެއަރގައި ބައިވެރިވެފައިވާ އެހެން ޤައުމުތަކުގެ ވިޔަފާރިވެރިންނާ ބައްދަލްކޮށް، ވިޔަފާރީގެ ދާއިރާއިން މަޝްވަރާކޮށް ޚިޔާލް ބަދަލު ކުރުމުގެ ފުރުޞަތު ލިބިގެންދިޔަކަމަށްވެސް އާދަމް ތައުފީގް ވިދާޅުވިއެވެ.