ޕީ.އެސް.އެމްގެ މޯލްޑިވްސް މީޑިއާ އިންސްޓިޓިއުޓް، އެމް.އެމް.އައިން އަންނަ އަހަރު ފެށުމަށް ހަމަޖެހިފައިވާ ކޯސްތަކާ ގުޅޭ މަޢުލޫމާތު ދިނުމަށްޓަކާ ޙާއްސަ އެޑިއުކޭޝަން ފެއަރއެއް ބާއްވަން ނިންމައިފިއެވެ. މި ފެއަރ އޮންނާނީ އަންނަ ހޮނިހިރު ދުވަހު ހަވީރު ހަތަރަކުން ރޭގަނޑު ދިހައަކަށް ރަސްފަންނު ސަރަޙައްދުގައެވެ.
އެމް.އެމް.އައިއިން އަންނަ އަހަރު ފެށުމަށް ތައްޔާރުވަމުންދާ ކޯސްތަކުގެ ތެރޭގައި، ޕަރފޯމިން އާރޓްސްއާއި، މަލްޓި-މީޑިއާގެ އިތުރުން ބްރޯޑްކާސްޓިންގ ދާއިރާއާއި ގުޅުންހުރި ގިނަ ކޯސްތަކެއް ހިމެނެއެވެ. މީގެ އިތުރުން މޭލޭޝިޔާގެ ލިމްކޮކްވިންގް ޔުނިވަރސިޓީއާއި އެމްއެމްއައި ގުޅިގެން ކުރިއަށް ގެންދާ އެޔުނިވަރސިޓީގެ އިންޓަރނޭޝަލް ޕްރޮގްރާމްތައްވެސް ހިމެނެއެވެ. ހޮނިހިރު ދުވަހު ކުރިއަށްދާ މި ފެއަރގެ ތެރެއިން މި ކޯސްތަކާއި ގުޅޭ މަޢުލޫމާތާއި، ރަޖިސްޓްރޭޝަންގެ ކަންކަމާއި ގުޅޭ މަޢުލޫމާތު ލިބޭނެއެވެ.
އެމްއެމްއައި އަކީ 2015 ވަނަ އަހަރު ރަޖިސްޓްރީކޮށް މީޑިއާގެ ދާއިރާއިން ތަމްރީން ޕްރޮގްރާމްތައް ހިންގުމަށް ޕަބްލިކް ސަރވިސް މީޑިޔާ، ޕީއެސްއެމްއިން އުފެއްދި ޓްރެއިނިންގ އިންސްޓިޓިއުޓެކެވެ. އެގޮތުން އިންސްޓިޓިއުޓުން ދަނީ މީޑިޔާގެ ދާއިރާއިން ތަފާތު ތަމްރީން ޕްރޮގްރާމްތައް ހިންގަމުންނެވެ. އަދި އިންސްޓިޓިއުޓު ޔުނިވަރސިޓީ ފެންވަރަށް ތަރައްޤީކުރުމަށް ޕީއެސްއެމްއިން ދަނީ އަމާޒް ހިފާ އެކަމަށް މަސައްކަތް ކުރަމުންނެވެ.