މި އަހަރުގެ ޖެނެރަލް މެނޭޖަރ ފޯރަމް އަންނަ އޭފްރީލް މަހުގެ 18 ވަނަދުވަހު ބާއްވަން ނިންމައިފިއެވެ.
ހޮޓެލިއަރ މޯލްޑިވްސް އިން އިންތިޒާމްކޮށްގެން ދެހާސް ސޯޅަވަނަ އަހަރުން ފެށިގެން ކޮންމެ އަހަރަކުވެސް ބާއްވަމުން އަންނަ މި ފޯރަމަކީ ރިސޯޓްތަކުގެ ޖެނެރަލް މެނޭޖަރުންނަށް އަމާޒުކޮށްގެން ބާއްވާ ފޯރަމެކެވެ.
މި ފޯރަމްގެ ބެނުމަކީ ފަތުރުވެރިކަމުގެ ދާއިރާގައި މިހާރު ދިމާވެފައިވާ ގޮންޖެހުންތަކާ ބެހޭގޮތުން މިދާއިރާގެ ފަރާތްތައް އެއްތަނަކުން ބައްދަލުވެ އެކަމާއިމެދު މަޝްވަރާ ކުރުމެވެ. މިފަހަރު ފޯރަމްގައި މައިގަނޑު ގޮތެއްގައި ޚިޔާލުބަދަލުކުރާނީ ފަތުރުވެރިކަމުގެ ދާއިރާއިން ނެގޭ ޓެކްސްތަކާއި، ޑެސްޓިނޭޝަން މާކެޓްކުރުމާއި، ހޮޓެލްތަކަށް ފައިދާ ހޯދޭނެ އިތުރު ގޮތްތަކާ ބެހޭގޮތުންނެވެ. ހޮޓެލިއަރ މޯލްޑިވްސް އިން ބުނީ މި ފޯރަމްގައި 100 އަށްވުރެ ގިނަ ޖެނެރަލް މެނޭޖަރުން ބައިވެރިވާނެކަމަށެވެ.
މި ފޯރަމްގެ ތެރެއިން ޕެނަލް ޑިސްކަޝަންތަކާއި، ފަތުރުވެރިކަމުގެ ތަޖުރިބާކާރު ބޭރުގެ ފަރާތްތަކުން ޕްރެޒެންޓޭޝަންތައް ހުށަހަޅައިދޭނެއެވެ.
މިއަހަރުގެ ފޯރަމް އޮންނާނީ ކުރުނބާ މޯލްޑިވްސްގައެވެ. މިދިޔަ އަހަރުގެ ޖީއެމް ފޯރަމް ބާއްވާފައިވަނީ ހުޅުލޭ އައިލެންޑް ހޮޓެލްގައެވެ. މިދިޔަ އަހަރުގެ ފޯރަމްގައި 140 ބައިވެރިން ބައިވެރިވިކަމަށް ހޮޓެލިއަރ މޯލްޑިވްސްއިން ބުނެއެވެ.