ހޮޓެލިއަރ މޯލްޑިވްސް އިން އިންތިޒާމްކޮށްގެން ބާއްވާ ޖެނެރަލް މެނޭޖަރ ފޯރަމްގައި ބައިވެރިވުމުގެ ފުރުސަތު ހުޅުވާލައިފިއެވެ. ހޮޓެލިއަރ މޯލްޑިވްސްއިން ބުނީ މިއަހަރުގެ ފޯރަމްގައި ބައިވެރިވާން ބޭނުންވާ ފަރާތްތަކަށް އެ ފުރުޞަތު މިހާރު ހުޅުވިފައިވާކަމަށެވެ.
މި އަހަރުގެ ޖެނެރަލް މެނޭޖަރ ފޯރަމް އޮންނާނީ އަންނަ އޭފްރީލް މަހުގެ 18 ވަނަދުވަހު ކުރުނބާ މޯލްޑިވްސްގައެވެ.
ދެހާސް ސޯޅަވަނަ އަހަރުން ފެށިގެން ކޮންމެ އަހަރަކުވެސް ބާއްވަމުން އަންނަ މި ފޯރަމަކީ ރިސޯޓްތަކުގެ ޖެނެރަލް މެނޭޖަރުންނަށް އަމާޒުކޮށްގެން ބާއްވާ ފޯރަމެކެވެ. މި ފޯރަމްގެ ބޭނުމަކީ ފަތުރުވެރިކަމުގެ ދާއިރާގައި މިހާރު ދިމާވެފައިވާ ގޮންޖެހުންތަކާ ބެހޭގޮތުން މިދާއިރާގެ ފަރާތްތައް އެއްތަނަކުން ބައްދަލުވެ އެކަމާއިމެދު މަޝްވަރާ ކުރުމެވެ. މިފަހަރު ފޯރަމްގައި މައިގަނޑު ގޮތެއްގައި ޚިޔާލުބަދަލުކުރާނީ ފަތުރުވެރިކަމުގެ ދާއިރާއިން ނެގޭ ޓެކްސްތަކާއި، ޑެސްޓިނޭޝަން މާކެޓްކުރުމާއި، ހޮޓެލްތަކަށް ފައިދާ ހޯދޭނެ އިތުރު ގޮތްތަކާ ބެހޭގޮތުންނެވެ. މި ފޯރަމްގެ ތެރެއިން ޕެނަލް ޑިސްކަޝަންތަކާއި، ފަތުރުވެރިކަމުގެ ތަޖުރިބާކާރު ބޭރުގެ ފަރާތްތަކުން ޕްރެޒެންޓޭޝަންތައް ހުށަހަޅައިދޭނެއެވެ.
މިދިޔަ އަހަރުގެ ޖީއެމް ފޯރަމް ބާއްވާފައިވަނީ ހުޅުލޭ އައިލެންޑް ހޮޓެލްގައެވެ. މިދިޔަ އަހަރުގެ ފޯރަމްގައި އެކިއެކި ކުންފުނިތަކުން 68 ޖެނެރަލް މެނޭޖަރުންނާއި، 97 ޑެލިގޭޓުން ބައިވެރިވެފައިވާއިރު 21 ބްރޭންޑެއް ވަނީ ބައިވެރިކޮށްފައެވެ. 2016 ވަނަ އަހަރުގެ ފޯރަމްގައި 47 ޖެނެރަލް މެނޭޖަރުން ބައިވެރިވިއިރު 76 ޑެލިގޭޓުން ބައިވެރިވެ 16 ބްރޭންޑެއްވަނީ ބައިވެރިވެފައެވެ.