ފަތުރުވެރިކަމުގެ ދާއިރާ ދިމާވާ ދަތިތަކުން ބާރަށް އަރައިގަންނާނެ

ރާއްޖޭގެ ފަތުރުވެރިކަމުގެ ދާއިރާއަކީ ދިމާވާ ދަތިތަކުން ވަރަށް ބާރަށް އަރައިގަންނަ އިންޑަސްޓްރީއެއްކަމަށް ޓޫރިޒަމް މިނިސްޓަރ މޫސާ ޒަމީރު ވިދާޅުވެއްޖެއެވެ. ޓޫރިޒަމް މިނިސްޓަރ މިހެން ވިދާޅުވީ ރާއްޖޭގެ ފަތުރުވެރިކަމަށް ޙާއްސަކޮށްގެން މުޅިން އަލަށް ނެރެންފެށި މަޖައްލާއެއްކަމަށްވާ ޓްރެވެލް އެންޑް ޓޫރިޒަމް މަޖައްލާ އިފްތިތާހްކޮށްދެއްވުމުގެ ރަސްމިއްޔާތުގައި ވާހަކަދައްކަވަމުންނެވެ.

ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިސްތިހާރު ކުރުމަށް ސަރުކާރާއި ފަތުރުވެރިކަމުގެ ދާއިރާގައި ޙަރަކާތްތެރިވާ އަމިއްލަ ފަރާތްތަކުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ފަތުރުވެރިކަން އިސްތިހާރު ކުރުމަށް މީގެ 7 އަހަރު ކުރިން ރާއްޖޭގައި އުފެއްދި އަމިއްލަ ކުންފުންޏެއް ކަމަށްވާ މޯލްޑިވްސް ޕްރޮމޯޝަނަލް ހައުސްއަކީ ފާހަގަކޮށްލެވޭ އެއް ކުންފުންޏެވެ. މި ކުންފުނިން ރާއްޖޭގެ ފަތުރުވެރިކަން އިސްތިހާރު ކުރުމުގެ މަސައްކަތް އެންމެ ފުރަތަމަ ފަށާފައިވަނީ އޮންލައިން ވެބްސައިޓެއް މެދުވެރިކޮށެވެ. ނަމަވެސް މި މަސައްކަތް ފުޅާކޮށް އެކުންފުނިން ވަނީ ރާއްޖޭގެ ފަތުރުވެރިކަމާ ގުޅޭ މަޖައްލާއެއްވެސް ނެެރެން ފަށާފައެވެ.

img:http://s2.psmnews.mv/images/660x400/15218302176114.JPG|ޓްރެވެލް އެންޑް ޓޫރިޒަމް މަޖައްލާ ނެރުމުގެ ރަސްމިއްޔާތުގެ ތެރެއިން

މޯލްޑިވްސް ޕްރޮމޯޝަނަލް ހައުސްއިން ރާއްޖޭގެ ފަތުރުވެރިކަމަށް ޙާއްސަކޮށްގެން ނެރުނު ދެވަނަ މަޖައްލާ، ޓްރެވެލް އެންޑް ޓޫރިޒަމް މަޖައްލާ އިފްތިތާހްކޮށްދެއްވީ ރާއްޖޭގެ ޓޫރިޒަމް މިނިސްޓަރ މޫސާ ޒަމީރެވެ. މި މަޖައްލާ އިފްތިތާހްކޮށްދެއްވުމަށްފަހު ވާހަކަފުޅުދައްކަވަމުން މިނިސްޓަރ ޒަމީރު ވިދާޅުވީ ރާއްޖޭގެ ފަތުރުވެރިކަމުގެ ދާއިރާއަކީ އަބަދުވެސް ދިމާވާ ދަތިތަކުން ވަރަށް ބާރަށް އަރައިގަންނަ ދާއިރާއެއްކަމަށެވެ. މިނިސްޓަރ ވިދާޅުވީ ރާއްޖޭގެ ފަތުރުވެރިކަމަށް މިފަހުން ދިމާވި އެންމެބޮޑު ގޮންޖެހުމަކީ ކުއްލި ނުރައްކަލުގެ ހާލަތުކަމަށްވާއިރު، މިފަދަ ހާލަތަކުން އަރައިގަނެ ރާއްޖޭގެ ފަތުރުވެރިކަން ކުރިންއޮތް ހާލަތަށް ގެންދިއުމަށް އަމިއްލަ ފާރާތްތަކުން ކުރާ މިފަދަ މަސައްކަތްތަކަކީ ފާހަގަކޮށްލެވޭ މަސައްކަތްތަކެއް ކަމަށެވެ. ސަރުކާރާއި އަމިއްލަ ފަރާތްތައް ގުޅިގެން މިއަހަރަކީ މިދިޔަ އަހަރަށްވުރެ ފަތުރުވެރިކަމުގެ ދާއިރާގައި ކާމިޔާބު އަހަރަކަށް ހެދުމަށް ގިނަ މަސައްކަތްތަކެއް ކުރަމުންދާކަން މިނިސްޓަރ ވަނީ ފާހަގަ ކުރައްވާފައެވެ.

"އަޅުގަނޑުމެން އަބަދުވެސް ބުނަމުން އަންނަހެން އަޅުގަނޑުމެންނަކީ ކޮންމެ އަހަރަކުވެސް ޓޫރިޒަމް އިންޑަސްޓްރީއަކީ ދިމާވާ ޖެލެންޖްތަކަށް އެއަށް ބައުންސް ބެކްކޮށް ވަރަށް ބާރަށް އަޅުގަނޑުމެންނަށް ދިމާވާ ދަތިތަކުން ކުރިއަރައިގެން އައިސް ނަތީޖާ އަޅުގަނޑުމެން ކުރިންއޮތް ދުވަހަށްވުރެ ރަނގަޅުގޮތަކަށް ބަދަލުކޮށްލާ." ޓޫރިޒަމް މިނިސްޓަރ މޫސާ ޒަމީރު ވިދާޅުވިއެވެ.

img:http://s1.psmnews.mv/images/660x400/15218302390741.JPG|ޓްރެވެލް އެންޑް ޓޫރިޒަމް މަޖައްލާ ނެރުމުގެ ރަސްމިއްޔާތުގެ ތެރެއިން

ޓްރެވެލް އެންޑް ޓޫރިޒަމް މެގަޒިންއާ ބެހޭގޮތުން މަޢުލޫމާތުދެމުން ޑިރެކްޓަރ އޮފް ސްޓޯރީ ޓެލިންގ ޢަލީ ނާފިޒް ވިދާޅުވީ އަލަށް ނެރެންފެށި މި މެގަޒިންގައި ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ހުރިހާ ފަރާތްތަކަށް ބޭނުންވާ ހުރިހާ މަޢުލޫމާތެއްވެސް ހިމަނާފައިވާނެކަމަށެވެ.

"މީގަ ކަވަރ ކުރާނެ ކުއަރިޒަމް އިންޑަސްޓްރީގެ އެންމެނަށް ބޭނުންވާ، މެނޭޖްމަންޓްގައި އުޅޭ ފަރާތްތަކަށް ބޭނުންވާ، ރާއްޖެ އަންނަން ބޭނުންވާ ޓޫރިސްޓުންނާއި، ރާއްޖެ އައިސްތިބޭ ޓޫރިސްޓުންނަށްވެސް ބޭނުންވާ ހުރިހާ އެއްޗެއް ޙަބަރު ދެން ޕީޗާރސް، މީހުންގެ އިންޓަވިއު ހުރިހާއެއްޗެއް އަންނާނެ." ޢަލީ ނާފިޒް ވިދާޅުވިއެވެ.

މޯލްޑިވްސް ޕްރޮމޯޝަނަލް ހައުސްއިން އަލަށް ނެރެންފެށި ޓްރެވެލް އެންޑް ޓޫރިޒަމް މެގަޒިން ޕްރޮމޯޓްކޮށްދިނުމަށް ޕީއެސްއެމްގެ މޯލްޑިވްސް ޓީވީއިން އެހީތެރިކަން ފޯރުކޮށްދޭނެއެވެ. މި މެގަޒިން ކޮންމެ 2 މަހަކުން އެއްފަހަރު ނެރޭނެކަމަށާއި، ރާއްޖޭގެ ހުރިހާ ރިސޯޓްތަކަށާއި ބޮޑެތި ކުންފުނިތަކަށް މީގެ ކޮޕީ ބަހާނެކަމަށް އެ ކުންފުނިން ބުނެއެވެ.

މޯލްޑިވްސް ޕްރޮމޯޝަނަލް ހައުސްއިން ދަނީ ރާއްޖޭގެ ފަތުރުވެރިކަން ޕްރޮމޯޓްކޮށް ރާއްޖެއަށް އަންނަން ބޭނުންވާ ފަތުރުވެރިންނަށް ޙާއްސަކޮށްގެން މޯލްޑިވްސް އިންސައިޑަރގެ ނަމުގައިވެސް މެގަޒިންއެއް ނެރެމުންނެވެ. މި މެގަޒިން ދުނިޔޭގެ ބޮޑެތި ފެއަރތަކާއި ހޮޓާތަކާއި އެއަރޕޯޓްތަކުގައިވެސް އަންނަނީ ޕްރޮމޯޓްކުރަމުންނެވެ.