މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓަރސް (މަޓާޓޯ) އިން ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިޝްތިހާރުކުރުމަށް ކުރަމުންދާ މަސައްކަތް މިހަރު ވަރަށް ފުޅާ ދާއިރާއެއްގައި ކުރިޔަށްގެންދާނެކަމަށް އެ އެސޯސިއޭޝަނުން ބުނެފިއެވެ.
މަޓާޓޯގެ ޑެޕިއުޓީ ސެކްރެޓަރީ ޖެނެރަލް އަސްރާ ނަސީމް ވިދާޅުވީ މިއަހަރަކީ ޑެސްޓިނޭޝަން މާކެޓިންގައި މަޓާޓޯއިން ގިނަ މަސައްކަތްތަކެއް ކުރާނެ އަހަރެއްކަމަށެވެ. އެގޮތުން އަހަރު ފެށިގެން މިހާތަނަށް އައިއިރު ކޮންމެ މަހެއްގައިވެސް ބައިނަލްއަޤުވާމީ ކޮންމެވެސް ފެއަރއެއް ނުވަތަ ރޯޑްޝޯއެއްގައި މަޓާޓޯއިން ދިވެހިރާއްޖެ ތަމްސީލްކޮށްފައިކަން އަސްރާ ފާހަގަކުރެއްވިއެވެ. އަދި އަހަރުގެ ކުރިއަށްއޮތް ދުވަސްތަކުގައިވެސް ޑެސްޓިނޭޝަން މާކެޓިންގެ މަސައްކަތްތައް ކުރިއަށްދާނެކަމަށް އޭނާ ވިދާޅުވިއެވެ.
"ހުރިހާ ބޭފުޅުންނަށްވެސް ބޮޑަށް ހީވަނީ އަޅުގަނޑުމެން މީހަމައެކަނި ޓްރެވެލް އެވޯޑްގެ މަސައްކަތް ކުރާ ބައެއްހެން. އެހެންނަމަވެސް ޓްރެވެލް އެވޯޑަށްވުރެ ޙާއްސަކޮށް އަޅުގަނޑުމެންގެ ޑެސްޓިނޭޝަން މާކެޓިންގެ އެފޯޑްސްތައް ބޮޑުވާނެ." އަސްރާ ނަސީމް ވިދާޅުވިއެވެ.
ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިޝްތިހާރުކުރުމުގެ އިތުރުން މިދާއިރާގައި މަސައްކަތްކުރާ ފަރާތްތަކުގެ ކުރަމުންދާ މަސައްކަތްތައް ފާހަގަކޮށް އެކަމުގެ އަގުވަޒަންކުރުމުގެ ގޮތުން މަޓާޓޯއިން އަންނަނީ މޯލްޑިވްސް ޓްރެވެލް އެވޯޑުގެ ނަމުގައި އެވޯޑެއްވެސް ދެމުންނެވެ. މީގެ އިތުރުން މިދާއިރާއަށް މީހުން ބިނާކުރުމުގެ ގޮތުން ތަފާތު ވޯކްޝޮޕްތައްވެސް އެ އެސޯސިއޭޝަނުން މިހާރު އަންނަނީ ހިންގަމުންނެވެ.