ޗައިނާގެ "ޓްރެވެލް އެންޑް ލެޝާ" މަޖައްލާއިން ހޮވާ އެންމެ މަޤްބޫލް މަންޒިލަކަށް ރާއްޖެ ހޮވިއްޖެއެވެ. އަދި އެ މަޖައްލާއިން ހޮވާ ދުނިޔޭގެ އެންމެ މަޤްބޫލް 8 މަންޒިލްތަކުގެ ތެރޭގައިވެސް ރާއްޖެ ވަނީ ހިމެނިފައެވެ. ދަތުރުކުރަން އެންމެ ރަނގަޅު މަންޒިލް ނުވަތަ ބެސްޓް ޓްރެވެލް ޑެސްޓިނޭޝަންއަކަށް ރާއްޖެ ހޮވުމާއި ގުޅިގެން އެ މަޖައްލާއިން ވަނީ ރާއްޖެއަށް ޙާއްޞަ އެވޯޑެއް ދީފައެވެ. މި އެވޯޑާއި ހަވާލުވީ ޗައިނާގައި ހުންނަވާ ދިވެހި ސަފީރު މުޙައްމަދު ފައިސަލްއެވެ.
ރާއްޖޭގެ އިތުރުން ދެން އެ މަޖައްލާއިން ހޮވި މަޤްބޫލް މަންޒިލްތަކުގެ ތެރޭގައި ސްވިޒަލޭންޑާއި ކެނެޑާއާއި ފްރާންސާއި އެމެރިކާއާއި އިނގިރޭސިވިލާތާއި ފިންލެންޑާއި އަދި އުޒްބެކިސްތާން ހިމެނެއެވެ.
ޗައިނާ މާކެޓަކީ ރާއްޖޭގެ ފަތުރުވެރިކަމުގެ ދާއިރާގައި މުހިންމު މާކެޓެއްކެވެ. ޗައިނާ އަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ އެއް ޤައުމަށްވެސް ވަނީ ވެފައެވެ. މިއަހަރުގެ ޖަނަވަރީ މަހުގެ ތެރޭގައި ޗައިނާއިން ރާއްޖެއަށް ސަތޭކަ ސާޅީސް ދެހާސް ތިންސަތޭކަ ފަންސާސް އެއް ފަތުރުވެރިން ވަނީ ޒިޔާރަތްކޮށްފައެވެ. މިއީ 2017 ވަނަ އަހަރުގެ ޖަނަވަރީ މަހާއި އަޅާބަލާއިރު 13.6 އިންސައްތައިގެ ކުރިއެރުމެކެވެ. މިއަހަރުގެ ފެބްރުއަރީ މަހުގެ ތެރޭގައި ރާއްޖެއަށް ސަތޭކަ ސާޅީސް ހަތަރުހާސް ދުއިސައްތަ އަށްޑިހަ ހަ ފަތުރުވެރިން ޒިޔާރަތްކޮށްފައިވާއިރު، މިއީ އޭގެކުރީ އަހަރާއި އަޅާބަލާއިރު 19.2 އިންސައްތަ އިތުރު އަދަދެކެވެ.