ފަތުރުވެރިންނަށް ދިވެހިރާއްޖެއާ ގުޅޭ މަޢުލޫމާތު ފަސޭހައިން ލިބޭނެ ގޮތް ހެދުމުގެ ގޮތުން ޕިކް މޯލްޑިވްސްއިން ޚާއްޞަ ބްރޭންޑެއް ތަޢާރަފްކޮށްފިއެވެ.
މޯލްޑިވްސް އެފްކިއުއޭގެ ނަމުގައި ތަޢާރަފްކުރި މި ބްރޭންޑަކީ، ދިވެހިރާއްޖެއަށް ޒިޔާރަތް ކުރާ އަދި ރާއްޖެއަށް ޒިޔާރަތް ކުރަން ބޭނުންވާ ފަތުރުވެރިންނަށް އަމާޒުކޮށްގެން ދިވެހިރާއްޖެއާ ގުޅޭ ސުވާލާއި ޖަވާބު އެފަރާތްތަކާ ހަމައަށް ގެނެސްދިނުމުގެ ގޮތުން ތަޢާރަފްކުރި ބްރޭންޑެއްކަމަށް ޕިކް މޯލްޑިވްސްއިން ބުނެއެވެ.
ޕިކް މޯލްޑިވްސްއިން މި ބްރޭންޑް ތަޢާރަފްކޮށްފައިވަނީ ރޭ ޖަރުމަނުވިލާތުގައި ހުންނަ ރާއްޖޭގެ އެމްބަސީއިން ރާއްޖެ އިޝްތިހާރު ކުރުމުގެ ގޮތުން ބޭއްވި ޚާއްސަ އިވެންޓެއްގައެވެ. މި ބްރޭންޑް ލޯންޗުކޮށްދެއްވީ ޖަރުމަންވިލާތުގައި ހުންނަ ދިވެހިރާއްޖޭގެ އެމްބެސެޑަރ ޖަމީލާ ޢަލީއެވެ.
ޕިކް މޯލްޑިވްސްއިން ވަނީ މި ބްރޭންޑުގެ ޚާއްސަ ބްރޯޝަރ އެއް އެ ރަސްމިއްޔާތުގައި ބައިވެރިވި ފަރާތްތަކަށް ދައްކާލާފައެވެ. މި ރަސްމިއްޔާތުގައި މޯލްޑިވްސް އެފްކިއުއޭގެ ރަސްމީ ވެބްސައިޓުވެސް ވަނީ އިފްތިތާޙްކޮށްފައެވެ. މި ވެބްސައިޓުވެސް އިފްތިތާޙް ކޮށްދެއްވީ ރާއްޖެއިން ޖަރުމަނު ވިލާތަށް ކަނޑައަޅުއްވާފައި ހުންނަވާ ސަފީރު ޖަމީލާ ޢަލީއެވެ.
މި ރަސްމިއްޔާތުގައި ވާހަކަދައްކަވަމުން ޕިކްމޯލްޑިވްސްގެ ޗެއަރމަން ރިޢާޔަތު ޢަބްދުލްމަޖީދު ވިދާޅުވީ ހޮވާލެވޭ ވަކި ޢަދަދަކަށް ޕިކްމޯލްޑިވްސް ފޮތްތަކާއެކު، މި ބްރޯޝަރ ބަހާނެކަމަށެވެ. އަދި އެންމެ ބޮޑު އިސް ކަމެއް ދޭނީ ކުރިއަށް އޮތްތަނުގައި މޯލްޑިވްސް އެފްއޭކިއުގެ ވެބްސައިޓު އެކި ބަސްބަހުން ފެނިގެންދާނެ ކަމަށެވެ. އަދި ރާއްޖެއަށް ޒިޔާރަތްކުރަން ބޭނުންވާ މީހުން ރާއްޖެއާ ބެހޭގޮތުން އެނގެން ބޭނުންވާ ކަންކަމާއި އުފެދޭ ސުވާލުތަކުގެ ޖަވާބުވެސް މި ވެބްސައިޓު މެދުވެރިކޮށް ލިބޭނޭ އިންތިޒާމް ހަމަޖެހިގެންދާނެ ކަމަށް ރިޢާޔަތު ވިދާޅުވިއެވެ.
ރިޢާޔަތު ވިދާޅުވީ ގިނަ ބައެއްގެ މަޤުބޫލުކަން ހޯދާފައިވާ ޕިކްމޯލްޑިވްސް ފޮޓޯ ފޮތުގައި ހިމެނޭ ފޮޓޯތަކާއި ރިވިއުތައް ކިޔާލުމުގެ ކުރިން ރާއްޖެއާ ބެހޭ ޢާންމު މަޢުލޫމާތުތައް ކުރުކޮށް އެއްތަނަކުން ކިޔާލެވި ރާއްޖެއާ ދޭތެރޭ އިތުރަށް ކޮންފިޑެންސް އުފެއްދުންއެއީ މޯލްޑިވްސް އެފްއޭކިއު ބްރޭންޑުގެ އެންމެ މުހިންމު މަޤުޞަދު ކަމަށެވެ.