ޒުވާނުން ބާރުވެރިކުރުވައި އިޖްތިމާޢީ ކަންކަމުގައި އެމީހުންގެ ދަޢުރު އިތުރުކުރުމަށް ކުރިއަށްގެންދާ މަސައްކަތު ބައްދަލުވުން ދ.ކުޑަހުވަދޫގައި ފަށައިފިއެވެ. "ޖުމްހޫރިއްޔަތާއި ޒުވާނުން" މިނަމުގައި ކުރިއަށްގެންދާ މި ބައްދަލުވުމަކީ މި ސިލްސިލާގެ 4 ވަނަ ބައްދަލުވުމެވެ.
ހޯމް މިނިސްޓްރީން އިންތިޒާމުކޮށްގެން ކުރިއަށްގެންދާ ބައްދަލުވުން މިއަދުން ފެށިގެން 2 ދުވަހަށް ކުރިއަށްދާއިރު ދ އަތޮޅުގެ އެކި ރަށްތަކުން 50 އަށްވުރެ ގިނަ ޒުވާނުން ބައިވެރިވެއެވެ.
މި މަޝްވަރާ ބައްދަލުވުންތަކުގައި އިސްލާމްދީނުގައި ޒުވާނުން ބާރުވެރިކުރުމަށް ބާރުއަޅާ މިންވަރާއި އިސްލާމީ ތާރީޚުގެ އެކި ދުވަސްވަރު އުޅުއްވި މަޝްޙޫރު ލީޑަރުންނާ ބެހޭ ގޮތުން ބައިވެރިންނަށް މަޢުލޫމާތުދިނުންވެސް ކުރިއަށްދާނެކަމަށް ހޯމް މިނިސްޓްރީން ބުނެއެވެ. އަދި ދިވެހި ޖުމްހޫރިއްޔާއާއި ރާއްޖޭގެ ތާރީޚާއި ބެހޭގޮތުންނާއި ޒުވާން ލީޑަރުންގެ ގޮތުގައި މުޖުތަމަޢުގައި ދަމަހައްޓަންޖެހޭ އަޚްލާޤީ އަދި ސްލޫކީ މިންގަނޑުތަކާ ބެހޭގޮތުންނާއި ޤައުމުގެ އަމާންކަން ދެމެހެއްޓުމަށް ޒުވާނުންގެ ދަޢުރާ ބެހޭގޮތުން މަޝްވަރާކޮށް އެކަމުގައި ބައިވެރިންގެ ޚިލާޔު ހޯދާނެކަމަށްވެސް ހޯމް މިނިސްޓްރީން ބުނެއެވެ.
ޒުވާނުންނަށް އަމާޒުކޮށްގެން ކުރިޔަށް ގެންދާ މި ބައްދަލުވުންތައް ހޯމް މިނިސްޓްރީން ފުރަތަމަ ފަށާފައިވަނީ 2015 ވަނަ އަހަރުއެވެ. މީ މީގެ ހަތަރުވަނަ ބައްދަލުވުމެވެ. މީގެ ކުރިން މި ބައްދަލުވުންތައް ބާއްވާފައިވަނީ ފުވައްމުލަކު ސިޓީއާއި ކުޅުދުއްފުށި އަދި ލ.އަތޮޅުގައެވެ. މިދިޔަ ތިން ބައްދަލުވުމުގައި 200 އަށްވުރެ ގިނަ ޒުވާނުންނަށް ބޭނުންތެރި ގިނަ މަޢުލޫމާތުތަކެއް ދީފާއިވާކަމަށް ހޯމް މިނިސްޓްރީން ބުނެއެވެ.