ކ. އަކިރިފުށީގައި ތަރައްޤީކޮށްފައިވާ އޮބްލޫ ސިލެކްޓް އެޓް ސަންގެލި ރިސޯޓް މިމަހުގެ 1 ވަނަ ދުވަހު ހުޅުވައި އެ ރިސޯޓަށް ޒިޔާރަތްކުރި ފުރަތަމަ ފަތުރުވެރިންގެ ގުރޫޕަށް މަރުހަބާ ކިޔައިފިއެވެ. މި ރިސޯޓަށް ޒިޔާރަތްކުރި ފުރަތަމަ ފަތުރުވެރިންގެ ގުރޫޕަށް މަރުޙަބާ ކިޔާފައިވަނީ ދިވެހި ސަޤާފީ މިއުޒިކާއި އަދި ނެށުމާއިއެކުއެވެ.
މާލެއަތޮޅު އަކިރިފުށިން ބައެއް ހިއްކައިގެން އިންޑިއާ ކަނޑުގެ ހޮސްޕިޓަލިޓީ ބްރޭންޑެއްކަމަށްވާ އެޓްމޮސްފިއާ ހޮޓެލްސް އެންޑް ރިސޯޓުން ތަރައްޤީކޮށްފައިވާ އޯ ބްލޫ ސިލެކްޓް އެޓް ސަންގެލި ރިސޯޓުގައި މުޅި ޖުމްލަ 137 ވިލާ ހުރެއެވެ. 4 ތަރީގެ މި ރިސޯޓްގައި ބީޗް ވިލާ އާއި ޑިލަކްސް ބީޗް ވިލާ ގެ އިތުރުން ވޯޓާ ވިލާ ހުންނާނެކަމަށް އެރިސޯޓުން މައުލޫމާތުދެއެވެ.
މިއީ އެޓްމޮސްފިއަރ ހޮޓެލް އެންޑް ރިސޯޓްސްއިން ރާއްޖޭގައި ހުޅުވި 4 ވަނަ ރިސޯޓެވެ. އެކުންފުނިން ރާއްޖޭގައި ހިންގާ އެހެން ރިސޯޓްތަކުގެ ތެރޭގައި ކަނިފުށި ރިސޯޓާއި، އޮޒެން ބައި އެޓްމޮސްފިއަރ އެޓް މާދޫ ހިމެނެއެވެ. މިއަހަރުގެ ތެރޭގައި ރާއްޖޭގެ އެކި ސަރަހައްދުތަކުގައި ގިނަ އަދަދެއްގެ ރިސޯޓްތައް ހުޅުވުމަކީ ރައީސް ޔާމިންގެ ސަރުކާރުގެ އަމާޒެކެވެ. ފަތުރުވެރިކަން ފުޅާކުރުމަށާއި ފަތުރުވެރިކަން އިޝްތިޙާރު ކުރުމަށް ސަރުކާރުން ދަނީ މަސައްކަތް ކުރަމުންނެވެ.