މަތިވެރީގެ ނަރުދަމާ ނިޒާމާއި ނިލަންދޫގެ ފެނުގެ ނިޒާމު ޤާއިމުކުރުމުގެ މަސައްކަތް ކުންފުންޏަކާ ހަވާލުކޮށްފި

އއ. މަތިވެރީގެ ނަރުދަމާ ނިޒާމާއި ފ. ނިލަންދޫގެ ފެނުގެ ނިޒާމު ޤާއިމުކުރުމަށް ލޭބަރ ކޮންޓްރެކްޓް މޮޑެލްގެ ދަށުން ލަންކާގެ އެޑްވާޑް އެންޑް ކްރިސްޓީއާއި ޙަވާލުކޮށްފިއެވެ.

މި މަސައްކަތް އެ ކުންފުންޏާ ހަވާލުކުރުމަށް އެންވާރަމެންޓް މިނިސްޓްރީގައި ބޭއްވި ރަސްމިއްޔާތުގައި މިކަމާގުޅޭ އެއްބަސްވުމުގައި އެ މިނިސްޓްރީގެ ފަރާތުން ސޮއިކުރެއްވީ، މިނިސްޓަރ އޮފް އެންވާރަމެންޓް އެންޑް އެނަރޖީ ޠާރިޤް އިބްރާހިމްއެވެ. އަދި އެޑްވާޑް އެންޑް ކްރިސްޓީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަރަވަލޭޖް ޑޮން ރާޖް ކްރިސްޓީ ލިއޮނާޑެވެ.

މި އެއްބަސްވުމުގެ ދަށުން ކުރަންޖެހޭ މަސައްކަތްތައް ކުރުމަށް ބޭނުންވާ ސާމާނު އެޑްވާޑް އެންޑް ކްރިސްޓީން ކުންފުންޏަށް ފޯރުކޮށްދޭނީ އެސްޓީއޯއިންނެވެ.

އެއްބަސްވުމުގައި ސޮއިކުރެއްވުމަށްފަހު ވާހަކަފުޅުދަކައްކަވަމުން އެންވަޔަރަމަންޓް މިނިސްޓަރ ޠާރިޤް އިބްރާޙިމް ވިދާޅުވީ މި މަޝްރޫއުތައް ޑިޒައިންކޮށް ނިމިފައިވާކަމަށާއި އަމަލީ މަސައްކަތް ވީ އެންމެ އަވަހަކަށް ފެށުމުގެ މަސައްކަތް ކުރަމުންދާކަމަށެވެ.

މިނިސްޓަރ ވިދާޅުވީ މިދިޔަ ހަތަރު އަހަރު ދުވަހުގެތެރޭގައި މި ސަރުކާރުން ރާއްޖޭގެ އާބާދީގެ 75 އިންސައްތައަށް ނަރުދަމާގެ ޚިދުމަތް ފޯރުކޮށްދީފައިވާކަމަށެވެ. އެގޮތުން މި ސަރުކާރުން މިހާތަނަށް 22 ރަށެއްގެ ނަރުދަމާގެ މަސައްކަތް ނިންމާފައިވާކަން މިނިސްޓަރ ފާހަގަކުރެއްވިއެވެ. އަދި މި ސަރުކާރު އައުމުގެ ކުރިން މާލެއާއެކު 6 ރަށެއްގައި ފެނުގެ ނިޒާމް ޤާއިމްކޮށްފައި އޮތްނަމަވެސް، ސަރުކާރުގެ އަމާޒަކީ އާބާދީގެ 75 އިންސައްތައަށް ފެނުގެ ނިޒާމް ފޯރުކޯށްދިނުންކަމަށެވެ. މިނިސްޓަރ ޠޯރިޤް ވަނީ އާރުއޯ ޕްލާންޓް ބޭނުންކޮށްގެން ފެން ފޯރުކޮށްދިނުމުގެ މަޝްރޫއުތަކާއި ހޫނު މޫސުމުގައި ފެނަށް ޖެހޭ ޖެހުން ހައްލުކުރުމަށް މަސައްކަތް ކުރަމުންދާކަން ފާހަގަކުރައްވާފައެވެ.

" މިސަރުކާރު އައިރު ރާއްޖޭގެ އާބާދީގެ 37 އިންސައްތައަށް ނަރުދަމާ ނިޒާމް ފޯރުކޮށްދީފައިވާއިރު އެއީ 31 ރަށް. އެއާ ޚިލާފަށް މިހާރުވެސް 22 ރަށެއްގައި ނަރުދަމާ ނިޒާމް ނިމި 42 ރަށެއްގައި ނަރުދަމާ ނިޒާމްގެ މަސައްކަތް އެކި މަރުހަލާތަކަށް ކުރަމުންދަނީ. ހުރިހާ ރަށެއްގެ މަސައްކަތްވެސް މިއަހަރުތެރޭގައި ނިމިގެންދާނެ. ކުރިން މާލެއާއެކު 6 ރަށެއްގައި ފެނުގެ ނިޒާމްޤާއިމްކޮށްފައި އޮންނަމަވެސް އަމާޒަކީ އާބާދީގެ 75 އިންސައްތަ ފެނުގެ ނިޒާމް ފޯރުކޯށްދިނުން." މިނިސްޓަރ ޠާރިޤް ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަވަމުން ނިލަންދޫ ދާއިރާގެ މެމްބަރު ޑރ.ޢަބްދުﷲ ޚަލީލް ވިދާޅުވީ މި މަޝްރޫއުގެ ސަބަބުން އެ ދާއިރާގެ ފެނުގެ ނިޒާމަށް ހައްލެއްލިބިގެން ދާނެކަމަށެވެ. ޚަލީލް ވަނީ މި ސަރުކާރުން ފެނުގެ ނިޒާމްމާއި ނަރުދަމާ ނިޒާމްގެ ޚިދުމަތްދިނުމަށް ކުރައްވަމުން ގެންދަވާ މަސައްކަތްތައް ފާހަގަކުރައްވާފައެވެ.

މީގެ ކުރީގައި ވާރޭފެން ބޭނުންކުރާނެ މާ ރަނގަޅު ނިޒާމެއް ނެތި އޮއްވާ މި ސަރުކާރުން ފެނުގެ ނިޒާމްގެ ތެރެއަށް މި މަސއްކަތް ހިމަނައިގެން ކުރިއަށްގެންދުމަކީ މުހިއްމުކަމެއް. ތަރައްޤީގެ އެތައްކަމެއް މި ވޭތުވެދިޔަ ހަތަރު އަހަރާ ބައިގެ ތެރޭގައި ފެނިގެންގޮސްފި. މިގޮތުން ފ. ނިލަންދޫގެ ފެނުގެ ނިޒާމު ޤާއިމްކުރާއިރު ވާރޭފެން ރައްކާކޮށް ބެހުމުގެ ނިޒާމަކާއި ގޭގެއަށް ފެން ގުޅުމުގެ މަސައްކަތްކުރުމަށް ހަމަޖެހިފައިވެއެވެ." ޑރ.ޚަލީލް ވިދާޅުވިއެވެ.

އއ. މަތިވެރީގެ ނަރުދަމާ ލޭބަރ މަޝްރޫޢުގެ ކޮންޓްރެކްޓްގެ ޖުމްލަ އަގު (13,558,970.00) 13.5 މިލިޔަން ދިވެހި ރުފިޔާއަށްވުރެ ގިނަ އެވެ. އަދި ފ. ނިލަންދޫގެ ފެނުގެ ލޭބަރ މަޝްރޫޢުގެ ކޮންޓްރެކްޓް އަގު (16,724,160.60) 16.7 މިލިޔަނަށްވުރެ ގިނަ އެވެ. ރުފިޔާއެވެ.

މި ދެ މަސައްކަތްވެސް ނިންމުމަށް ކަނޑައެޅިފައިވަނީ ސޮއިކުރާ ތާރީޚުން ފެށިގެން 12 މަސް ދުވަހުގެ ތެރޭގައެވެ.