އޭޝިޔާ ޕެސިފިކް ބްރޯޑްކާސްޓިންގ ޔޫނިއަން، އޭބީޔޫ ބައިނަލްއަޤްވާމީ ރޭޑިއޯ ސޯންގް ފެސްޓިވަލްގައި ރާއްޖެ ތަމްސީލްކުރާ ޢަބްދުﷲ ޒިޔާއު އެ ފެސްޓިވަލްގައި ލަވަހުށެހެޅުމުގެ އެންމެފަހު ތައްޔާރީތައް ވާންފަށައިފިއެވެ.
މިމަހުގެ 11 ވަނަދުވަހު ކަޒަކިސްތާންގެ އާސްތާނާގައި އޮންނަ އޭބީޔޫ ފެސްޓިވަލްގައި ޒިޔާޢު ބައިވެރިވާނީ، ޕީއެސްއެމްއިން ހުޅުވާލި ފުރުޞަތުގައި ވާދަކޮށްގެންނެވެ. މޯލްޑިވިއަން އައިޑޮލް ސީޒަން 1ގައި ވާދަކުރި އައްޑުއަށް އުފަން ޒިޔާއުވަނީ އެ ޝޯގެ ޕިއާނޯ ރައުންޑާހަމަޔަށް ދަތުރުކޮށްފައެވެ. މިފަހަރުގެ ފެސްޓިވަލްގައި ހުށައަޅާދޭން ހަމަޖެހިފައިވަނީ "ކުރިއަށްދާނީ ގަދަ ހިތްވަރުން "ގެ ނަމުގައި ތައްޔާރުކޮށްފައިވާ ލަވައެކެވެ. މިއީ އަމިއްލަ ރާގަކަށް ތައްޔާރުކޮށްފައިވާ ލޯފަންކުދިންނަށް ޚާއްސަކޮށްފައިވާ ލަވައެކެވެ.
2016 ވަނަ އަހަރު ޖަޖިން ރައުންޑްއިން ފެއިލްވުމުގެ ސަބަބުން އޭބީޔޫގައި ލަވަ ހުށަހަޅަން ނުލިބުނު ޒިޔާއު ހުރީ މިފަހަރުގެ ފެސްޓިވަލްގައި ލަވަ ހުށައަޅާދޭން ފުރުޞަތު ލިބުމުން ވަރަށް އުފަލުންނެވެ. އަދި ޚާއްސައެހީއަށް ބޭނުންވާ ކުދިންނަށްނަށްވެސް މިފަދަ ބޮޑުފެސްޓިވަލެއްގައި ވާދަކުރެވޭނެކަން ހާމަކޮށްދިނުމަށް ލިބިގެންދިޔަ ރަނުގެ ފުރުޞަތެއްކަން ފާހަގަކުރިއެވެ.
މިފަހަރުގެ ފެސްޓިވަލްގައި ރާއްޖެއާއެކު 9 ޤައުމަކުން ވާދަކުރެއެވެ. އޭގެތެރޭގައި ފެސްޓިވަލް ބާއްވާ ކަޒަކަސްތާނާއި އިންޑިއާއާއި އަފްޣާނިސްތާން، މަކާއޯ، ނޭޕާލް، ތުރުކީ، ތުރުކެމިނިސްތާން އަދި ވިއެޓްނާމް ހިމެނެއެވެ.
އޭބީޔޫ ރޭޑިޔޯ ސޯންގް ފެސްޓިވަލްގައި މިދާއިރާއިން ކުރިއަށްދާން ބޭނުންވާ ދިވެހިންނަށް އެފުރުސަތު ހޯދައިދީ، އެހެން ޤައުމުތަކުގެ މިއުޒިކީ ފަންނާނުންނާއި ބައްދަލުވެވި ގުޅުން އުފެދި ތަޖުރިބާތަކާއި ސަޤާފަތު ހިއްސާކުރާނެއެވެ. އޭބީޔޫއަކީ ދުނިޔޭގެ ފަސްދޮޅޮސް ނުވަ ޤައުމަކުން ބައިވެރިވެފައިވާ ބައިނަލްއަޤްވާމީ ޖަމިއްޔާއެކެވެ.
އޭބީޔޫ ސޯންގް ފެސްޓިވަލްގައި މިއީ ޕީއެސްއެމުން ރާއްޖެ ތަމްސީލްކުރާ ތިންވަނަ އަހަރެވެ. އެބީޔޫ ރޭޑިއޯ ސޯންގް ފެސްޓިވަލްގެ އިތުރުން ޓީވީ ސޯންގް ފެސްޓިވަލާއި އޭބީޔޫ ޑާންސް ފެސްޓިވަލްގައިވެސް ރާއްޖެ އަންނަނީ ވާދަކުރަމުންނެވެ. މި ފެސްޓިވަލްތަކުގައި ރާއްޖޭގައި ތިބި މަޝްހޫރު ލަވަކިޔުންތެރިންނާއި މި ދާއިރާއަށް އަލަށް ނިކުންނަ މީހުން ވާދަކޮށްފައިވާކަން ފާހަގަކުރެވެއެވެ.