ހއ.ދިއްދޫގައި ޤާއިމްކޮށްފައިވާ ހައުސިން ޔުނިޓްތަކުގެ ތެރެއިން 100 ހައުސިން ޔުނިޓް ވަރަށް އަވަހަށް ދޫކުރުމަށް ހަމަޖެހިފައިވާކަމަށް ހައުސިން މިނިސްޓަރ ޑރ.މުޙައްމަދު މުއްޒު ވިދާޅުވެއްޖެއެވެ.
ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ.މުޙައްމަދު މުއިއްޒު ވިދާޅުވީ ދިއްދޫގައި ޤާއިމް ކޮށްފައިވާ ހައުސިން ޔުނިޓްތަކުގެ ތެރެއިން މިހާތަނަށް ފުރުސަތު ހުޅުވާލާފައިނުވާ 100 ހައުސިން ޔުނިޓް އެބަހުރި ކަމަށާއި ދިއްދޫ ރައްޔިތުންނަށް ޚާއްސަކޮށްގެން 100 ހައުސިން ޔުނިޓަށް ކުރިމަތިލުމުގެ ފުރުސަތު ހުޅުވާލުމަށް ރައީސް އަބުދުﷲ ޔާމީން އަބުދުލްޤައްޔޫމް ނިންމަވާފައިވާކަމަށެވެ.
މި ހައުސިން ޔުނިޓްތަކަށް އަންނަ އާދިއްތަ ދުވަހުން ފެށިގެން ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށް ހައުސިން މިނިސްޓްރީއަށް ފޯމް ހުށަހެޅުމުގެ ފުރުސަތު ވަނީ ހުޅުވާލާފައެވެ.
މިނިސްޓަރ ވިދާޅުވީ މިކަމަކީ ދިއްދޫގެ ރައްޔިތުން ޚާއްސަކޮށް ޒުވާނުން ވަރަށް ބޮޑަށް އެދެމުންދާކަމެއް ކަމަށެވެ.
ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދަށުން ދިއްދޫގައި 250 ހައުސިން ޔުނިޓް ޤާއިމްކޮށްފައިވެއެވެ. އޭގެ ތެރެއިން 140 ހައުސިން ޔުނިޓް ވަނީ މީގެ ކުރިން ދޫކޮށްފައެވެ. އެހައުސިން ޔުނިޓްތައް ދޫކޮށްފައިވަނީ އެޑްވާންސް ޕޭމަންޓެއްގެ ގޮތުގައި 19000 ރުފިޔާ އަދި 20 އަހަރު ދުވަހުން ފައިސާ ދައްކާ ހަލާސްކުރާ އުސޫލުން މަހަކު 2500 ރުފިޔާ ދައްކާ ގޮތަށެވެ. މި ފަހަރު ހުޅުވާލި 100 ހައުސިން ޔުނިޓަށްވެސް ފައިސާ ދެއްކުމަށް ހަމަޖެހިފައިވަނީ މިއުޟޫޢުގެ ދަށުންނެވެ.