މޫވެންޕިކް ހޮޓެލްސް އެންޑް ރިސޯޓްސްއިން ރާއްޖޭގައި ހުޅުވާ ކުރެދިވަރު ރިސޯޓް މިއަހަރުގެ ނޮވެމްބަރ މަހު ހުޅުވާނެކަމަށް އެ ރިސޯޓުން ބުނެފިއެވެ.
މި ރިސޯޓްގައި 72 އޯވާވޯޓަރ ޕޫލް ވިލާއާއި، 33 ބީޗް ޕޫލް ވިލާ ހުންނާނެއެވެ. އަދި ފަތުރުވެރިންނަށް ޚިދުމަތްދިނުމަށް 4 ރެސްޓޯރަންޓް ހުންނާނެއެވެ.
ނ. އަތޮޅުގައި މަތީ ފެންވަރަށް ތަރައްޤީކުރާ މި ރިސޯޓަށް ވެލާނާ އިންޓަނޭޝަނަލް އެއަރޕޯޓުން 45 މިނެޓުގެ ތެރޭގައި ދެވޭނެއެވެ. މި ރިސޯޓް ހުޅުވާއިރު ރެކްރިއޭޝަނަލް ގިނަ ހަރަކާތްތަކެއް ހުންނާނެކަމަށާއި، އޭގެތެރޭގައި ޑައިވިންގެ ސެންޓަރުތަކާއި ވޯޓާ ސްޕޯރޓްސް ސެންޓަރުތައް ހުންނާނެކަމަށް އެ ރިސޯޓުން މައުލޫމާތުދެއެވެ.
މޫވެންޕިކް ހޮޓެލްސް އެންޑް ރިސޯޓްސްއިން ކުރެދިވަރު ތަރައްޤީކުރުމުގެ އެއްބަސްވުމުގައި ސޮއި ކުރީ މިދިޔަ އަހަރުގެ އޭޕްރީލް މަހުއެވެ.
ސުވިޒަލެންޓްގެ މޫވެންޕިކް ހޮޓެލްސް އެންޑް ރިސޯޓްސް އުފެދިފައިވަނީ 1973 ވަނަ އަހަރުގެ ތެރޭގައެވެ. އެ ކުންފުނިން އެފްރިކާ، އޭޝިޔާ މެދުއިރުމަތި އަދި ޔޫރަޕް ސަރަހައްދުގައި މިހާރުވެސް 82 ހޮޓެލް އަންނަނީ ހިންގަމުންނެވެ. އަމާޒަކީ 2020 ވަނަ އަހަރު އައުމުގެ ކުރިން މިޢަދަދު 125 އިތުރުކުރުންކަމަށް އެ ކުންފުނިން ބުނެއެވެ. އަހަރެއްގެތެރޭގައި 7.5 މިލިއަން ފަތުރުވެރިންނަށް އެ ކުންފުނިން އަންނަނީ ޙިދުމަތްދެމުންނެވެ.