އިންޑިއާ ކަނޑުގެ ލީޑިންގ ލަގްޜަރީ ވޯޓާ ވިލާގެ އެވޯޑް ޑަބްލިއު މޯލްޑިވްސް އަށް ލިބިއްޖެއެވެ.
ޑަބްލިއު މޯލްޑިވްސްއަށް މި އެވޯޑް ލިބުނީ ވޯލްޑް ޓްރެވެލް އެވޯޑްސްގެ ތެރެއިންނެވެ. ސައުތު އެފްރިކާގެ ޑަރބަން އިންޓަނޭޝަނަލް ކޮންވެންޝަން ސެންޓަރގައި ބޭއްވި މި އެވޯޑް ހަފްލާއަކީ އިންޑިއާ އަދި އެފްރިކާ ސަރަހައްދުގައި ދެވޭ އެންމެ ޝަރަފްވެރި އެއް އެވޯޑެވެ. މި ހަފްލާއަށް ސަރަހައްދުގެ ފަތުރުވެރިކަމުގައި ހަރަކާތްތެރިވާ އިސް ފަރާތްތަކުން ވަނީ ބައިވެރިވެފައެވެ.
އއ. އަތޮޅުގައި އޮންނަ ޑަބްލިއު މޯލްޑިވްސްގައި 77 ވިލާ ހުރެއެވެ. މީގެތެރޭގައި ބީޗްވިލާ އަދި އޯވަވޯޓަރ ވިލާ ހިމެނެއެވެ. ވޯލްޑް ޓްރެވެލް އެވޯޑަކީ ދުނިޔޭގެ ފަތުރުވެރިކަމުގެ ސިނާއަތްކުރިއަރުވައި މި ސިނާއަތުގައި މަސައްކަތްކުރާ ފަރާތްތަކުގެ އަގުވަޒަންކުރުމުގެ ގޮތުން ދޭއެވޯޑެކެވެ. މިއީ މި އެވޯޑްދޭ 25 ވަނަ އަހަރެވެ.