މިއަހަރުގެ ފުރަތަމަ 6 މަސްދުވަސް ނިމުނުއިރު ރާއްޖެއަށް ފަތުރުވެރިން ގެނައުމަށް ކަނޑައަޅާފައިވާ އަމާޒުގެ %50 ޙާސިލްވެފައިވާކަމަށް މޯލްޑިވްސް މަނިޓަރީ އޮޓޯރިޓީގެ ކުއަރޓާލީ އެކޮނޮމިކް ބުލެޓިންއިން ދައްކައިފިއެވެ.
އެމްއެމްއޭއިން ނެރެފައިވާ ބުލެޓިންއިން ދައްކާގޮތުން މިމުއްދަތުގެ ތެރޭގައި ރާއްޖެއަށް ޖުމްލަ 726515 ފަތުރުވެރިން ވަނީ ޒިޔާރަތް ކޮށްފައެވެ. އެހެންކަމުން މިއީ މިއަހަރު ރާއްޖެއަށް ގެނައުމަށް ކަނޑައަޅާފައިވާ އަމާޒުކަމުގައިވާ 1.5 މިލިއަން ފަތުރުވެރިންގެ ދެބައިކުޅައެއްބައިކަން ވަނީ ފާހަގަކޮށްފައެވެ.
މިއަހަރުގެ ފުރަތަމަ 6 މަސްދުވަހު ފަތުރުވެރިންނަށް ޚިދުމަތް ދިނުމަށް ރާއްޖޭގައި ރަޖިސްޓްރީކޮށްފައިވާ އެނދުގެ ނިސްބަތް %10 އިތުރުވެފައިވާކަމަށް މި ބުލެޓިންގައި ވަނީ ފާހަގަކޮށްފައެވެ. އެނދުގެ ނިސްބަތް އިތުރުވިނަމަވެސް 2017 ވަނަ އަހަރުގެ މިމުއްދަތާއި އަޅާބަލާއިރު އޮކިއުޕަންސީރޭޓް ވަނީ %61 އިންސައްތައަށް ދަށްވެފައެވެ. 2017 ވަނަ އަހަރުގެ ފުރަތަމަ 6 މަސްދުވަހު ފަތުރުވެރިކަމުގެ އޮކިއުޕަންސީރޭޓް އުޅުނީ %63 ގައެވެ.
މިމުއްދަތުގެ ތެރޭގައި އެނދުގެ ނިސްބަތް އިތުރުވެފައިވަނީ ރާއްޖޭގައި ހުޅުވި، ރިސޯޓްތަކާއި ގެސްޓްހައުސްތަކުގެ ޢަދަދު އިތުރުވުމާއި ގުޅިގެންނެވެ. މިއަހަރު އަލަށް 3 ރިސޯޓެއް ހުޅުވާފައިވާއިރު، 58 ގެސްޓްހައުސް ވަނީ ހުޅުވާފައެވެ. 2017 ވަނަ އަހަރުގެ ފުރަތަމަ 6 މަސްދުވަހު ފަތުރުވެރިންނަށް ޚިދުމަތް ދިނުމަށް ރާއްޖޭގައި ރަޖިސްޓްރީކޮށްފައިވަނީ 3646 އެނދެވެ. މިއަހަރުގެ މިމުއްދަތުގައި މި އަދަދު ވަނީ 41290 އަށް އިތުރުވެފައެވެ.