ކަޅުވަކަރު މިސްކިތް ބަހައްޓާނެ ތަނެއް ކަނޑައެޅުމާ ގުޅޭގޮތުން ފޯރަމެއް ބޭއްވުމަށް މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖުން ނިންމައިފިއެވެ.
މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖާއި، މާލެ ސިޓީ ކައުންސިލް ގުޅިގެން ބާއްވާ މިފޯރަމްއަކީ އާއްމުންނަށް ހުޅުވާލައިގެން ބާއްވާ ފޯރަމްއެކެވެ. މި ފޯރަމް ބޭއްވުމަށް ހަމަޖެހިފައިވަނީ މިމަހުގެ 19 ވާ ބުދަ ދުވަހުގެ ރޭ ރަސްރަނި ބަގީޗާގައެވެ.
ކުރީގެ ސަލްޓަން ޕާކާ އިންވެގެން ހުރި އާސާރީ މިސްކިތެއް ކަމަށްވާ ކަޅުވަކަރު މިސްކިތް 2016 ވަނަ އަހަރުގެ އޮގަސްޓްމަހު ރޫޅާލައިގެން އެތަނުން ނެގީ ގދ. ތިނަދޫގެ ކުރީގެ ހުކުރު މިސްކިތް ހުރި ބިމުގައި އެ މިސްކިތް އަލުން ރާވައި ހުޅުވުމަށެވެ. ނަމަވެސް ދެ އަހަރު ވެގެން ދިޔައިރު އެ މިސްކިތް ތިނަދޫއަށް ގެންގޮސްފައި ނުވެއެވެ.
އެ މިސްކިތް އެންމެ ފުރަތަމަ ބަދަލު ކުރަން ނިންމީ، ހުޅުމާލޭގެ ދެވަނަ ފިޔަވަހީގައި ތަރައްޤީ ކުރާ ހެރިޓޭޖް އައިލެންޑަށެވެ. އެކަމަކު ފަހުން އެ މިސްކިތް ތިނަދޫއަށް ގެންގޮސް އެރަށުގައި ރާވާނެ ކަމަށް އޭރުގެ ސަރުކާރުން ބުންޏެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ވެރިކަމުގެ ފުރަތަމަ 100 ދުވަސް ތެރޭގައި ހެރިޓެޖް ދާއިރާއިން ކުރަން ނިންމާފައިވާ ކަންތައްތަކުގެ ތެރޭގައި އެ މިސްކިތް ހޯދައި، 90 ދުވަސްތެރޭގައި އަލުން ރޭވުމަށް ވަނީ ނިންމާފައެވެ. ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރުން ކަޅުވަކަރު މިސްކިތް ރޫޅާލުމަށްފަހު މިސްކިތުގެ ބައިތައް ބަހައްޓާފައިހުރީ ގައުމީ ދާރުލްއާޘާރުގައެވެ. އަދި އެ މިސްކިތް އަލުން ރޭވުމުގެ ކުރިން ހިރިގަލަށާއި ވަކަރަށް ފަރުވާ ދޭން ޖެހޭ ކަމަށް މިނިސްޓަރ އޮފް އާޓްސް، ކަލްޗާ އެންޑް ހެރިޓޭޖް ޔުމްނާ މައުމޫން ވަނީ ވިދާޅުވެފައެވެ.