ރަސްފަންނު ސަރަހައްދުގައި ކޮރަލް ބޮލެވާޑް ހެދުމަށް ބަންދުކޮށްފައިވާ މަގު އަލުން ހުޅުވާލުމަށް ޓްރާންސްޕޯޓް މިނިސްޓްރީން ބުނެފައެވެ.
ރަސްފަންނު ކައިރީގައި އޮންނަ ބޮޑުތަކުރުފާނު މަގު އެއްގަމު ދަތުރުފަތުރަށް ބަންދުކޮށްފައިވަނީ ސިންގަޕޫރުގެ ޗަންގހުއާ ކޮންސްޓްރަކްޝަން ކުންފުންޏާ ހަވާލުކޮށްގެން އެތަނުގައި ތަރައްޤީކުރާ "ކޮރަލް ބޮލެވާޑް" ފްލެޓްތައް ތަރައްޤީކުރުމުގެ މަޝްރޫޢު ކުރިއަށްގެންދިއުމަށެވެ. އެހެންނަމަވެސް މިހާރު އެ ފްލެޓްތައް އެޅުމުގެ މަސައްކަތް ހުއްޓުފައިވުމާއެކު، އެމަގު ހުޅުވުމުގެ މަސައްކަތް ކުރަމުންދާކަމަށް ޓްރާންސްޕޯޓް މިނިސްޓްރީން މައުލޫމާތުދެއެވެ.
އެގޮތުން މަގު ހުޅުވުމަށްޓަކައި ކަމާބެހޭ ފަރާތްތަކާއެކު މަޝްވަރާ ކުރަމުންދާކަމަށްވެސް އެ މިނިސްޓްރީން ބުނެއެވެ. ނަމަވެސް މަގު ހުޅުވޭނެ ވަކި ތާރީޚެއް ޓްރާންސްޕޯޓް މިނިސްޓްރީން ހާމަކޮށްފައެއްނުވެއެވެ.
މާލެ ވަށައިގެން ދުއްވޭގޮތަށް ރިންގް ރޯޑް ހުޅުވާލުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވެރިކަމުގެ 100 ދުވަހުގެ ވަޢުދުތަކުގެ ތެރޭގައި ހިމެނޭކަމެކެވެ.