ވެސްޓް ޕާރކް ކުރިމަތީގައިވާ ކަނބާއައިސާރަނި ހިނގުމުގައި ބޮޑަށް ހަލާކުވެފައިވާ ސަރަޙައްދުގައި ގާ އަތުރާ ނިމިފައިވާކަމަށް މާލޭ ސިޓީ ކައުންސިލުން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން މާލެ ސިޓީ ކައުންސިލްގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ ވެސްޓް ޕާރކް ހިމެނޭ ސަރަޙައްދުގެ މަގުތަކުގެ ހަލާކުވެފައިވާ ތަންތަން މަރާމާތުކުރުމުގެ މަސައްކަތް މާލޭ ސިޓީ ކައުންސިލުން ބާރު ސްޕީޑުގައި ކުރަމުންދާކަމަށެވެ. އެގޮތުން މާލޭ ވެސްޓް ޕާރކް ސަރަޙައްދުގެ މަގުތައް ވަރަށްބޮޑަށް އަޑިގުޑަންވެ ހަލާކުވެފައިވާތީ، އެ މަގު ހެދުމުގެ މަސައްކަތް މާލޭ ސިޓީ ކައުންސިލުން ވަނީ ފަށާފައެވެ.
ވެސްޓް ޕާރކް ކުރިމަތީގައިވާ ކަނބާއައިސަރަނި ހިނގުމާއި، ބޮޑުތަކުތުފާނު މަގުގެ މެދުން ގަނބައިގެންފައިވާ ވަޅުތައް ރަނގަޅުކުރުމަށްޓަކައި އެމަގުން 2700 އަކަފޫޓުގައި ޖަހާފައިވާ ގައުތައް ނެގުމަށްފަހު އަލުން މަގު އެއްވަރުކޮށް، ގައު އެތުރުމަށް ވަނީ ހަމަޖެހިފައެވެ. އަދި މާލޭ ރިންގްރޯޑް ވަށައިގެން ދުއްވޭނެ ގޮތަށް ހެދުމުގެ މަސައްކަތް މިމަސް ނިމޭއިރު ނިންމާލެވޭނެކަމަށް އުންމީދުކުރައްވާކަމަށް މާލެ ސިޓީގެ ޑެޕިއުޓީ މޭޔަރ ވިދާޅުވިއެވެ.
މާލޭ ސިޓީގެ ހަލާކުވެފައިވާ މަގުތައް މަރާމާތުކޮށް، މަގުތަކުން ފޮހެވިފައިވާ ޓްރެފިކް ނިޝާންތައް އައު ކުރުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ. އެގޮތުން ޝަހީދުޢަލީ ހިނގުމާއި، ހަވީރީ ހިނގުމާއި، ނިކަގަސްމަގުގެ ހަލާކުވެފައިވާ ސަރަޙައްދުތައް މަރާމާތުކޮށްފައިވާއިރު، 150 އަށްވުރެ ގިނަ ކާނު މަރާމާތު ކޮށްފައިވާކަމަށް ސިޓީ ކައުންސިލުން މައުލޫމާތުދެއެވެ. އަދި ހަލާކުވެފައިވާ ސްޕީޑް ބްރޭކަރުތަކާއި، ޖަންގްޝަންތަކުގެ މަތިތައް މަރާމާތުކުރުމުގެ މަސައްކަތްވެސް މާލެ ސީޓީ ކައުންސިލުން ދަނީ ކުރަމުންނެވެ.
މީގެ އިތުރުން މާލޭގެ މަގުތަކުން ފެން ހިންދުމަށް ބޭނުންކުރާ ސެޓްލްމަންޓް ޓޭންކުތަކުގެ ތެރެއިން ހަލާކުވެފައިވާ 1 ޓޭންކް އަލުން މަރާމާތުކޮށްފައިވާކަމަށްވެސް ސިޓީ ކައުންސިލުން މައުލޫމާތުދެއެވެ.