ޢިމާރާތް ކުރުމުގެ ޤާނޫނުގެ ދަށުން ހަދަންޖެހޭ ގަވާއިދުތަކާ މެދު އާންމުންގެ ޚިޔާލު ހޯދުމަށް މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އިން ނިންމައިފިއެވެ.
ޕްލޭނިންގ މިނިސްޓްރީން ވަނީ ޢިމާރާތްކުރުމުގެ ޤާނޫނުގެ ދަށުން ހަދަންޖެހޭ ގަވާއިދުތަކުގެ ޑްރާފްޓާ މެދު ޢާންމުންގެ ޚިޔާލު ހުށަހެޅުމާއި އެކަމާ ބެހޭ މަސައްކަތު ބައްދަލުވުމެއް ބާއްވުމަށް ނިންމާފައެވެ. މި ބައްދަލުވުން އޮންނާނީ މިމަހުގެ 30 އަދި 31 ވަނަ ދުވަހުކަމަށާއި، މި ފޯރަމްގައި ބައިވެރިވާން ބޭނުންވާ މީހުން މާދަމާގެ ނިޔަލަށް މިނިސްޓްރީއަށް އީމެއިލް މެދުވެރިކޮށް އަންގަންޖެހޭނެކަމަށް އެ މިނިސްޓްރީން މައުލޫމާތުދެއެވެ.
މާލޭގައި ހަދަމުންދިޔަ އިމާރާތަކުން ސިމެންތި ބަސްތާއެއް ވެއްޓި ކުޑަކުއްޖަކު މަރުވުމާ ގުޅިގެން މާލެ ސިޓީގައި ޢިމާރާތްކުރުގެ މަސައްކަތްކުރާ ސައިޓްތަކުގައި ޤާނޫނާ ގަވާއިދުތަކާ ޚިލާފަށްހުރި ކަންތައްތައް ސިޓީ ކައުންސިލާއި، ސަރުކާރުގެ ސަމާލުކަމަށް ވަނީ އައިސްފައެވެ.
2017 ވަނަ އަހަރު ފާސްކުރި ޢިމާރާތް ކުރުމާބެހޭ ޤާނޫނުގެ ދަށުން ހަދަންޖެހޭ ގަވާއިދުތައް އަދިވެސް ނުހަދާ ހުރިކަމަށް ސަރުކާރުން ވަނީ ބުނެފައެވެ.