މިދިޔަ އަންގާރަދުވަހު ފަތިހު ތާޖް އެގްޒޯޓިކާ ރިސޯޓުގައި ހިނގި އަލިފާނުގެ ހާދިސާއަށްފަހު އެރިސޯޓުގެ އޮޕަރޭޝަންތައް ފަށައިފިއެވެ.
ތާޖް އެގްޒޯޓިކާ ރިސޯޓުން ބުނީ އަލިފާނުގެ ހާދިސާއަށްފަހު އޮޕަރޭޝަންތައް ފަށާފައިވާއިރު، މިހާދިސާ ހިނގަން މެދުވެރިވި ސަބަބު ކަމާބެހޭ ފަރާތްތަކާ ގުޅިގެން ތަހުޤީޤްކުރަމުންދާކަމަށެވެ.
އަންގާރަދުވަހު ފަތިހު އެނބޫދޫ ފިނޮޅު، ތާޖް އެކްޒޯޓިކާ ރިސޯޓް އެންޑް ސްޕާ މޯލްޑިވްސްގައި ހިނގި އަލިފާނުގެ ހާދިސާގައި އެ ރިސޯޓްގެ 5 މޫދު ކޮޓަރީގައި އަލިފާން ރޯވެ، ބޭނުން ނުކުރެވޭ ވަރަށް ވަނީ އަނދާފައެވެ. މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.
އެރިސޯޓަށް ލިބުނު ގެއްލުންތައް ޓޫރިޒަމް މިނިސްޓަރ އަލީ ވަޙީދު ވަނީ ބައްލަވާލައްވާފައެވެ. އަދި މިހާދިސާ ހިނގި ވަގުތު އެ ކޮޓަރި ތަކުގައި ތިބި ފަތުރުވެރިންގެ ހާލު ބައްލަވާލައްވައި، ސަރުކާރުން އެފަރާތްތަކަށް ފޯރުކޮށްދެވެން އޮތް އެހީތެރިކަމެއް ފޯރުކޮށްދެއްވާނެކަމަށް މިނިސްޓަރ ވަނީ ވިދާޅުވެފައެވެ.
އަންގާރަދުވަހުގެ ފަތިހު ތާޖް އެގްޒޯޓިކާ ރިސޯޓުގައި އަލިފާނުގެ ހާދިސާއެއް ހިނގާފައިވާއިރު މިމަހުގެ 2 ވަނަދުވަހު ހިނގި އަލިފާނުގެ ހާދިސާއެއްގައި ގިލި ލަންކަންފުށި ރިސޯޓްގެ މޫދު ކޮޓަރިތަކެއްގައި ވަނީ ރޯވެ އަނދާ އަޅިއަށް ވެފައެވެ. އެ ރިސޯޓްގައި ހިނގި އަލިފާނުގެ ހާދިސާގައި ރިސޯޓްގެ ހަތް ކޮޓަރިއާއި މައި ރެސްޓޯރަންޓާއި ބަދިގެވެސް ވަނީ އެއްކޮށް އަނދާފައެވެ. މީގެ އިތުރުން މިމަހުގެ 12 ވަނަދުވަހު ވަނީ ރީތި ބީޗް ރިސޯޓްގައިވެސް އަލިފާނުގެ ހާދިސާއެއް ހިނގާފައިވެއެވެ. ރީތި ބީޗްގައި ހިނގި އަލިފާނުގެ ހާދިސާގައި އެ ރިސޯޓްގެ އިންޖީނުގެ ހުންނަ އިމާރާތުގެ ތެރޭގައި ހުންނަ ދެ ގުދަނެއް ވަނީ އަނދާފައެވެ.
މި ފަދަ ހާފިސާތައް ތަކުރާރުވިޔަ ނުދިނުމަށް ފަތުރުވެރިންނަށް ޚިދުމަތްދޭ ތަންތަން އިންސްޕެކްޓްކުރުމުގެ މަސައްކަތް ޓުއަރިޒަމް މިނިސްޓްރީން ވަނީ ފަށާފައެވެ.