ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދުން ޤަވާއިދާ ޚިލާފަށް މަސްވެރިކަން ކުރަމުންދަނިކޮށް ކޯސްޓްގާޑުގެ ބެލުމުގެ ދަށަށް ގެނައި ސްރީލަންކާގެ 4 މަސްބޯޓު ފުލުހުންނާ ޙަވާލުކޮށްފިއެވެ.
ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދަށް ޤަވާއިދާ ޚިލާފަށް ވަދެ މަސްވެރިކަން ކުރަމުންދިޔަ ސްރީލަންކާގެ 4 މަސްބޯޓު ކޯސްޓްގާޑުގެ ބެލުމުގެ ދަށަށް ގެންގޮސްފައިވަނީ މިދިޔަ ހުކުރުދުވަހުއެވެ. މި 4 މަސްބޯޓުގެ ތެރެއިން 2 ބޯޓެއް ފެނިފައިވަނީ ހއ.ކެލާގެ އިރު އުތުރުން 103 ނޯޓިކަލް މޭލު ބޭރުންކަމަށް އެމްއެންޑީއެފުން މަޢުލޫމާތުދެއްވައެވެ. އަދި އަނެއް 2 ބޯޓު ފެނިފައިވަނީ ކުރިން ފެނުނު ދެ މަސްބޯޓު ހދ.ކުޅުދުއްފުއްޓަށް ގެނައުމަށް އެމްއެންޑީއެފް ކޯސްޓްގާޑު ހުރަވީ ދަތުރުކުރަމުންދަނިކޮށެވެ.
މި 4 މަސްބޯޓު ފުރަތަމަ ގެންގޮސްފައިވަނީ ހދ.ކުޅުދުއްފުށްޓަށެވެ. އެމްއެންޑީއެފުން ވިދާޅުވީ މި 4 ބޯޓު ފުލުހުންނާ ޙަވާލުކޮށްފައިވަނީ، ހުޅުމާލެއަށް ގެނައުމަށްފަހުކަމަށެވެ.