ތަރައްޤީގެ ރޮނގުގައި ރާއްޖެއަކީ ދުވެލި ބާރު ފާހަގަކޮށްލެވޭ ޤައުމެކެވެ. އާބާދީގެ ނިސްބަތުން ބަލާއިރު، ލިބޭ ޢާމްދަނީއާއި އާމްދަނީ އާބާދީގެ ބޮލަކަށް ޖެހޭ ނިސްބަތްވެސް މަތީ ޤައުމެކެވެ. މިކަންކަމުގައި ސަރަޙައްދީ ޤައުމުތަކާ އަޅައި ބަލާއިރު ރާއްޖެ އުޅެނީ މާކުރީގައެވެ.
ރާއްޖެ އަދިވެސްއޮތީ އަސާސީ ޚިދުމަތްތައް، ޚާއްސަކޮށް ރައްޔިތުންނަށް ފެނާއިނަރުދަމާގެ ޚިދުމަތްތައް ފޯރުކޮށްދިނުމުގައި ރާއްޖެއޮތީ ވަރަށް ފަހަތުގައެވެ. މިފަދަ އަސާސީ ޚިދުމަތްތައް ފޯރުކޮށްދިނުމުގައި ރާއްޖެއޮތީ 100އަހަރުގެ ފަހަތުގައިކަމަށްވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ސިފަކުރައްވައެވެ.
ރާއްޖޭގައި ފަތުރުވެރިކަމާއި، ސިއްޙީދާއިރާއާއި ތަޢުލީމީ ދާއިރާއާއި މިނޫނަސް މިފަދަ ދާއިރާތައް އެއްދުވަހުން އަނެއްދުވަހަށް ކުރިއަރައި ދުނިޔޭގެ ޤައުމުތަކަށް ގޮންޖަހަމުންދާއިރު، ރާއްޖޭގައި މީހުންދިރިއުޅޭ ހުރިހާ ރަށަކަށް ފެނާއި ނަރުދަމާގެ ޚިދުމަތްތައް މިހާތަނަށް ފޯރުކޮށްދެވިފައެއްނުވެއެވެ.
ޖިއޮގްރަފީގެ ގޮތުން ރާއްޖޭގެ ރަށްތައް ބެހިފައި އޮތްގޮތުން މިފަދަ އަސާސީ ޚިދުމަތްތައް ހުރިހާރަށެއްގައި ޤާއިމުކުރުމަކީ ޒަމާނުއްސުރެ ދަތިކަމަކަށް އޮތީވެފައެވެ. އެޚިދުމަތް އެދެވޭގޮތުގައި ފޯރުކޮށްދިނުމަށް މާލީގޮތުންނާއި ވަޞީލަތްތަކުގެ ގޮތުންވެސް ދަތިތައް ކުރިމަތިވެފައިވާކަމަށް އެހި ސަރުކާރުތަކުން ވިދާޅުވެފައިވެއެވެ.
އެހެންނަމަވެސް ރާއްޖޭގައި އެހެން ބައެއްޚިދުމަތްތަކާއި ބޮޑެތި މަޝްރޫޢުތައްވެސް ކުރިއަށްގެންދާފަދައިން ފެނާއި ނަރުދަމާގެ ޚިދުމަތް ހުރިހާ ރަށަކަށް ފޯރުކޮށްދިނުމަކީ ކުރަންޖެހޭކަމެއްކަމަށް ރައްޔިތުން ދެކެއެވެ. އަސާސީ ޚިދުމަތްތަކަކީ އާބާދީގެ ބޮޑުކުޑަ މިނަށް ބަލައިގެން ދޭންޖެހޭ ޚިދުމަތެއް ނޫންކަމަށް އެންމެންވެސް ދެކެއެވެ. ރައްޔިތުންގެ މިޝަކުވާތަކާއި ޝުޢޫރުތައް އަޑުއެއްސެވުމަށްފަހު ވެރިކަމާ ހަވާލުވެވަޑައިގަތް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވަނީ އެމަނިކުފާނުގެ ވެރިކަމުގެ 5 އަހަރުދުވަހުގެ ތެރޭގައި ރާއްޖޭގެ ހުރިހާ ރަށަކަށް ފެނާ ނަރުދަމާގެ ނިޒާމް ފޯރުކޮށްދެއްވާނެކަމަށް ވަޢުދުވެވަޑައިގެންފައެވެ.
މި އަމާޒަށް ވާޞިލްވުމަށްޓަކައި އެމަނިކުފާނުގެ ސަރުކާރުގެ ފުރަތަމަ ދުވަހުން ފެށިގެންވެސް މަސައްކަތްތަކެއް ކުރައްވަމުންގެންދަވައެވެ. 50އަށްވުރެ ގިނަ ރަށުގައި ފެނުގެ ނިޒާމް ޤާއިމްކޮށްދޭނެ ބަޔަކު ހޯދުމަށް މިހާރުވަނީ ބަޔަކު ހޯދުމަށް އިޢުލާންކޮށްފައެވެ. އަދި 5 ރަށެއްގައި މިމަސައްކަތް ކުރުމަށްޓަކައި މިހާރުވަނީ ބަޔަކާ ހަވާލުކޮށްފައެވެ. 40އަށްވުރެ ގިނަ ރަށުގައި ނަރުދަމާގެ ނިޒާމް ޤާއިމްކޮށްދޭނެ ބަޔަކު ހޯދުމަށް އިޢުލާންކޮށްފައިވާއިރު 4 ރަށެއްގައި މި މަޝްރޫޢު ކުރިއަށްގެންދިޔުމަށްޓަކައި ވަނީ ބަޔާކާ ޙަވާލުކޮށްފައެވެ.
ފެނާއި ނަރުދަމާގެ ޤައުމީ ސިޔާސަތުގެ އެންމެބޮޑު މަޤްޞަދަކީ ރައްކާތެރި ފެނާއި އެކަށީގެންވާ ނަރުދަމާގެ ޚިދުމަތް ރައްޔިތުންނަށް ކަށަވަރުކޮށްދިނުމާއި ފެނާއި ނަރުދަމާގެ ނިޒާމު ތަރައްޤީކުރުމުގައި ތިމާވެށްޓާ ރަށްޓެހި، ޚަރަދުކުޑަ ޓެކްނޮލޮޖީ ބޭނުންކުރުމާއި ފެނާއި ނަރުދަމާގެ ޚިދުމަތާބެހޭ ޤާނޫނީ އޮނިގަނޑު ހަރުދަނާކުރުމެވެ.
ޒަމާނުއްސުރެ އަސާސީ ޚިދުމަތްތަކުން މަޙުރޫމްވެފައިވާ ރައްޔިތުންގެ މިހާރުގެ އެންމެބޮޑު އުންމީދަކީ ރައީސް ޞާލިޙުގެ ސިޔާސަތާއެކު އެމީހުންގެ ރަށްރަށުގައި އަސާސީ ޚިދުމަތްތައް ފުރިހަމަވެގެން ދިއުމެވެ.