މަތީ ތަޢުލީމްގެ ފިރުޞަތުތައް ހޯދައިދިނުމަށްޓަކައިއިންޓަރނޭޝަނަލް އެޑިއުކޭޝަން އެކްސްޕޯއެއް ފަށައިފިއެވެ.
އަމިއްލަ ފަރާތަކާއި މެލޭޝީޔާގެ "ކިއު ސްޓަޑީ" އާ ގުޅިގެން ކުރިއަށް ގެންދާ މި އެކްސްޕޯ ކުރިއަށްގެންދަނީ ބިލަބޮންގް ހައި އިންޓަނޭޝަނަލް ސްކޫލްގައެވެ. މި އެކްސޕޯ މާލޭގައި ކުރިއަށްދާނީ މިމަހުގެ 20 ވަނަ ދުވަހާ ހަމައަށެވެ. އެކްސްޕޯ ކުރިއަށް ދާނީ ހަވީރު 4:00އިން ފެށިގެން ރޭގަނޑު 9:00 އަށެވެ.
މި އެކްސްޕޯގައި 12 ޔުނިވަރސިޓީއަކުން ބައިވެރިވާއިރު މެލޭޝިޔާގައި ހުންނަ އެކި ކެމްޕަސްތަކުން ވެސް މި އެކްސްޕޯގައި ބައިވެރިވެއެވެ.
މި އެކްސްޕޯގެ ތެރެއިން ޔުނިވަރސިޓީތަކުގައި ހުރި ކޯސްތަކާއި ކެރިއަރ ގައިޑެންސްއާއި ޕްލޭސްމަންޓް ހަމަޖެއްސުން ފަދަ މުހިއްމު ކަންކަން ކުރިއަށް ގެންދިއުމަށް ވަނީ ހަމަޖެހިފައެވެ.
މީގެ އިތުރުން އެކްސްޕޯއަށް އަންނަ މީހުންނަށް ސްކޮލަރޝިޕްގެ ފުރުޞަތުތަކާއި ޑިސްކައުންޓް ދިނުންފަދަ ކަންކަންވެސް ކުރިއަށްދާނެއެވެ.
މާލޭގައި ބާއްވާ މި އެކްސްޕޯގެ އިތުރަށް އަންނަ އާދިއްތަ ދުވަހު އައްޑޫގައިވެސް މި އެކްސްޕޯ ބޭއްވުމަށް ވަނީ ހަމަޖެހިފައެވެ. މިގޮތުން އައްޑޫ ސިޓީ ހިތަދޫ ނޫރާނީ ސްކޫލްގައި އެދުވަހު 4:00 އިން ރޭގަނޑު 8:00 އަށް މި އެކްސްޕޯ ކުރިއަށްގެންދިޔުމަށް ވަނީ ނިންމާފައެވެ.