ކަނބަލުން ކުރާ އެކި މަސައްކަތްތަކާއި އެ ކަނބަލުންގެ ވާހަކަތައް ގެނެސްދިނުމަށް "ވުމަން"ގެ ނަމުގައި މަޖައްލާއެއް ނެރެފިއެވެ.
އާއްމު ތަންތާގައި ވާހަކަދެއްކުމުގެ ހުނަރު އިތުރަށް ދަސްކޮށްދިނުމާއި ކަނބަލުންގެ މަސައްކަތްތައް ގެންދެދިނުމަށް އުފައްދާފައިވާ "ވުމަން ބައި ޓޯކްއެމް"ގެ ފުރަތަމަ މަޖައްލާ ނެރެދެއްވީ މާލޭގެ މަގުތައް ސާފުކުރުމުގެ މަސައްކަތުގައި ޙަރަކާތްތެރިވާ ވެމްކޯގެ މުވައްޒަފެއްކަމަށްވާ ނުޒުހަތު މުޙައްމަދެވެ. މި ހަފްލާގައި ވަނީ މި މަޖައްލާގެ ކޮޕީއެއް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދަށް ވެދުމަށް އަރުވާފައެވެ. މި ރަސްމިއްޔާޓުގައި ހައުސިން މިނިސްޓަރ އާމިނަތު އާޠިފާވެސް ބައިވެރިވެވަޑައިގެންނެވިއެވެ.
މި މަޖައްލާގައި ވަނީ 4 ކަނބަލަކު ކުރާ މަސައްކަތްތަކާއި އެމީހުންގެ ވާހަކަތައް ހިމަނާފައެވެ. އެގޮތުން ދުވުންތެރިއަކާއި ތިމާވެށި ހިމާޔަތް ކުރުމަށް މަސައްކަތްކުރާ ކަނބަލަކާއި ދިވެހި މަސައްކަތްތެރި ކަނބަލެއްގެ ވާހަކައާއި ބަޔަލޮޖިސްޓެއްގެ ގޮތުގައި ޙަރަކާތްތެރިވާ ކަނބަލެއްގެ ވާހަކަތައް މި މަޖައްލާގައި ހިނަމާފައިވެއެވެ.
މި މަޖައްލާ ނެރުމަށް ބޭއްވި ރަސްމިއްޔާތުގައި ވާހަކަދައްކަވަމުން ޓޯކް އެމްގެ މެނޭޖިން ޑިރެކްޓަރ މަރިޔަމް ވަޙީދާ ވިދާޅުވީ މި މައްޖައްލާގެ އިތުރުން ކުރިއަށް އޮތްތަނުގައި މިފަދަ އިތުރު މައްޖައްލާތައް ނެރެ އާއްމުންނަށް ނޭގޭ ނަމޫނާ ފަރާތްތަކުގެ ވާހަކަތައް ގެނެސްދޭނެކަމަށެވެ. އަދި މި މައްޖައްލާގެ އިތުރުން މުޖުތަމަޢުގައި ހުރި ތަފާތު މައްސަލަތަކަށް ބިނާކޮށް ވީޑިއޯ ކްލިޕްތަކެއްވެސް ތައްޔާރުކުރާނެކަމަށް އޭނާ ވިދާޅުވިއެވެ.
"ވުމަން ބައި ޓޯކްއެމް" އަކީ މުޖުތަމަޢުގައި ވާހަކަދެއްކުމުގެ ހުނަރު ދިރުވުމަށްޓަކައި މަސައްކަތް ކުރާ ބަޔެކެވެ. އެގޮތުން ސަރުކާރުގެ މުއްސަސާތަކުގައި މަސައްކަތް ކުރާ ފަރާތްތަކާއި އެކި ދާއިރާތަކުގައި މަސައްކަތްކުރާ ފަރާތްތަކަށް ވާހަކަދެއްކުމުގެ ހުނަރާގުޅޭ އެކިކަހަލަ ތަމްރީނުތައް ދެމުންދާކަމަށް "ވުމަން ބައި ޓޯކްއެމް"އިން ބުނެއެވެ.