އިނގިރޭސިވިލާތުގެ ވެރިރަށް ލަންޑަނުގައި ބަޔަކަށް ވަޅިން ޙަމަލާ ދިން މީހަކު ފުލުހުން ބަޑިޖަހާ މަރާލައިފިއެވެ.
ލަންޑަންގެ ފުލުހުން ބުނެފައިވަނީ އެމީހާ ގަޔަށް ބަޑިޖަހާ މަރާލުމުގެ ކުރިން އެމީހާވަނީ އެސަރަހައްދުގައި ހިނގާފައި ދިޔަ ދެމީހެއްގެ ގަޔަށް ވަޅިހަރާފަކަމަށެވެ. އެޙާދިސާގެ ސަބަބުން އެދެމީހުންނަށް އެކިވަރުގެ ޒަޚަމްތައް ލިބުނެވެ. ލަންޑަނުގެ ފުލުހުންވަނީ އެއީ ޓެރަރިސްޓް ޙަމަލާއެއްގެގޮތުގައި ކަނޑައަޅާފައެވެ. އިނގިރޭސިވިލާތުގެ ނޫސްތަކުން ބުނެފައިވަނީ ވަޅިން ޙަމަލާ ދިން މީހަކީ އިނގިރޭސި ފުލުހުން ފާރަލަމުން ދިޔަ މީހެއްކަމަށެވެ. ނަމަވެސް އެކަން ފުލުހުން ކަށަވަރުކޮށްދީފައެއް ނުވެއެވެ.
އެކަމާ ގުޅޭގޮތުން ކުރެއްވި ޓުވީޓެއްގައި އިނގިރޭސިވިލާތުގެ ބޮޑުވަޒީރު ބޮރިސް ޖޮންސަންވަނީ އެޤައުމުގެ ފުލުހުންނާ ކުއްލި އެހީދޭ ފަރާތްތަކަށް ތަޢުރީފުކުރައްވާފައެވެ.
މިދިޔަ އަހަރުގެ ނޮވެންބަރު މަހުވެސް ލަންޑަނުގައި މީހަކުވަނީ އެގޮތަށް ބަޔަކަށް ވަޅިން ޙަމަލާދީފައެވެ. އެފަހަރުގެ ޙަމަލާއަކީވެސް ޓެރަރިސްޓު ޙަމަލާއެއްކަމަށް ފުލުހުންވަނީ ކަނޑައަޅާފައެވެ. ފުލުހުންވަނީ އެމީހާއަށްވެސް ބަޑިން ޙަމަލާދީ މަރާލާފައެވެ.