ދުނިޔޭގައި ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަސް ފެތުރުން ހުއްޓުވުމަށް ޗައިނާއިން އެމެރިކާގެ އެހީތެރިކަން ޤަބޫލުކޮށްފައިނުވާކަމަށް އެމެރިކާގެ ވައިޓްހައުސްގެ ޤައުމީ ސަލާމަތާބެހޭ މުޝީރު ރޮބަރޓް އޯބްރައިން ވިދާޅުވެއްޖެއެވެ.
މިދިޔަ އަހަރުގެ ފަހުކޮޅު ޗައިނާގެ ހުބާއީ ޕްރޮވިންސްގެ ވުހާންގައި ފެތުރެންފެށުނު ކޮރޯނާވައިރަސް ޗައިނާގެ އިތުރުން ދުނިޔޭގެ 25 ޤައުމުކަށާއި ސަރަޙައްދަކަށްވަނީ ފެތުރިފައެވެ. މީގެ ތެރޭގައި އެމެރިކާ ވެސް ހިމެނެއެވެ.
އަރިދަފުސް ރޯގާގެ ޢަލާމަތްތައް ފެނުމަށްފަހު ފުއްޕާމޭގައި ފެން އުފެދުމަށް މެދުވެރިވާ ކޮރޯނާވައިރަސްގެ އަސަރުވަނީ 17،000 މީހުންނަށްކޮށްފައެވެ. އޭގެ ތެރެއިން 362 މީހުންވަނީ މަރުވެފައެވެ. އަދި ކޮރޯނާވައިރަސް ޖެހުމަށްފަހު ރަނގަޅުވެފައިވަނީ 523 މީހުންނެވެ.
އެމެރިކާގެ ސީބީއެސް ޓީވީ ޗެނަލަށް ދެއްވި ބަސްދީގަތުމެއްގައި ވައިޓްހައުސްގެ ތަރުޖަމާނު ރޮބަރޓް އޯބްރައިން ވިދާޅުވީ ޗައިނާއިންވަނީ މީގެ ކުރިން މިފަދަ ޙާލަތްތަކުގައި ހަޤީޤަތް އޮޅުވާލުމަށް މަސައްކަތްކޮށްފަކަމަށެވެ. ނަމަވެސް މިފަހަރު ޗައިނާއިން ގެންގުޅެނީ ދެފުށް ފެންނަ ސިޔާސަތެއްކަމަށާއި ކަމާގުޅުންހުރި ހުރިހާ ފަރާތްތަކާ މަޢުލޫމާތު ޙިއްސާކުރަމުންދާކަމަށް އޯބްރައިން ފާހަގަކުރެއްވިއެވެ. އޭނާ ވިދާޅުވީ މިއީ ބައިނަލްއަޤްވާމީ މައްސަލައެއްކަމަށާއި ވައިރަސް ފެތުރުން ހުއްޓުވުމަށް ކާމިޔާބުކަމާއެކު ކުރިމަތިލުމުގެ ތަޖުރިބާ އެމެރިކާގެ ކިބައިގައި އެބަހުރިކަމަށެވެ. އަދި ޗައިނާއިން ބޭނުންވެއްޖެ ޙާލަތެއްގައި އެކަމުގައި އެއްބާރުލުން ދޭނެކަމަށްވެސް އޭނާ ވިދާޅުވިއެވެ.
ކޮރޯނާވައިރަހުގެ ނުރައްކާ ބޮޑުވެ، ދުނިޔޭގެ ޞިއްޙަތު ޖަމްޢިއްޔާ، ޑަބްލިއުއެޗްއޯއިންވަނީ ދުނިޔޭގައި ޞިއްޙީ ކުއްލި ނުރައްކަލުގެ ޙާލަތު އިޢުލާންކޮށްފައެވެ.