މެދުއިރުމަތީގެ ޞުލްޙައިގެ މަޝްރޫޢު ކާމިޔާބުކުރެވޭނީ ހުރިހާ ފަރާތެއްގެ އެއްބާރުލުމާއެކު: ވިލާތުގެ އިއްތިޙާދު
ފަލަސްޠީނާއި އިސްރާއީލުގެ މައްސަލައަށް ޞުލްޙަ ގެނައުމަށްކަމަށް ބުނެ އެމެރިކާއިން އިޢުލާނުކޮށްފައިވާ ޞުލްޙައިގެ މަޝްރޫޢު ކާމިޔާބުކުރެވޭނީ ހުރިހާ ފަރާތެއްގެ އެއްބާރުލުމާއެކުކަމަށް ވިލާތުގެ އިއްތިޙާދުގެ ޚާރިޖީ ސިޔާސަތާބެހޭ އިސްވެރިޔާ ޖޮސެޕް ބޮރެލް ވިދާޅުވެއްޖެއެވެ.
އުރުދުނަށް ވަޑައިގެން އެޤައުމުގެ ޚާރިޖީ ވަޒީރާ ބައްދަލުކުރައްވާ ވާހަކަދައްކަވަމުން ބޮރެލް ވިދާޅުވީ އެމެރިކާއިން އިޢުލާންކޮށްފައިވާ މެދުއިރުމަތީގައި ޞުލްޙައިގެ މަޝްރޫޢުއަކީ ބައިނަލްއަޤުވާމީ ދުނިޔެއިން މީގެ ކުރިން ކަނޑައަޅާފައިވާ ގިނަ ޝަތުރުތުތަކާ ޚިލާފު މަޝްރޫޢުއެއްކަމަށެވެ. އަދި 1967ވަނަ އަހަރު އޮތް ސަރަޙައްދީ ރޮނގުތައް އަލުން ރުޖޫޢަކޮށް މިނިވަން ދެދަޢުލަތެއްގެ ގޮތުގައި ފަލަސްޠީނާއި އިސްރާއީލު ކަނޑައަޅުމަށް ކުރެވިފައިވާ މަސައްކަތްތަކަށްވެސް އެމެރިކާއިން ހުށަހަޅާފައިވާ މަޝްރޫޢު ހުރަސްއަޅާކަމަށް ވިލާތުގެ ޚާރިޖީ ސިޔާސަތާބެހޭ އިސްވެރިޔާ ވިދާޅުވިއެވެ.
އޭނާ ވިދާޅުވީ ވިލާތުގެ އިއްތިޙާދުން ދެފަރާތުގެ މިނިވަން ދަޢުލަތެއް އުފެއްދުމަށް އަބަދުވެސް ތާޢިދުކުރާނެކަމަށާއި އެކަމުގައި ބައިނަލްއަޤުވާމީ ޤާނޫނުތަކަށް އިސްކަން ދިނުމަށްވެސް ބާރުއަޅާނެކަމަށެވެ. އެބައްދަލުވުމުގައި ވާހަކަދައްކަވަމުން އުރުދުންގެ ޚާރިޖީ ވަޒީރު އައިމަން އަލްސަފާދީ ވިދާޅުވީ އުރުދުނުން ބޭނުންވަނީ މެދުއިރުމަތީގެ ޞުލްޙައިގެ މަޝްރޫޢުގެ ދަށުން ފަލަސްޠީނުގެ މިނިވަން ދަޢުލަތެއް އުފައްދާ އިރުމަތީ ޤުދުސަކީ އެދަޢުލަތުގެ ވެރިކަންކުރާ ރަށްކަމަށް ކަނޑައެޅުމަށްކަމަށެވެ.
އެމެރިކާގެ ހުށަހެޅުއްވުމުގައިވަނީ އިސްރާއީލުގެ ވެރިރަށަކީ ޤުދުސްކަމަށް ކަނޑައެޅުމާއި އެޤައުމުގެ ބާރުގެދަށަށް މުސްލިމުންގެ މުޤައްދަސް އަޤްޞާ މިސްކިތް ގެންދިއުމާއި ބައިނަލްއަޤުވާމީ ޤާނޫނުތަކާއި ޤަރާރުތަކާ ޚިލާފަށް އަޅާފައިވާ ޔަހޫދީ އާބާދީތަކަކީ އިސްރާއީލުގެ ރަސްމީ ބިންތަކެއްކަމަށް ކަނޑައެޅުމަށެވެ. މީގެ އިތުރުން ފަލަސްޠީނުގެ މިނިވަން ދަޢުލަތެއް އުފައްދާ އެޤައުމުގެ ވެރިރަށަކީ އިރުމަތީ ޤުދުސް ކައިރީގައި އޮންނަ އަބޫ ދިސްކަމަށް ކަނޑައެޅުމަށްވެސް އެމެރިކާއިން ހުށަހަޅާފައިވެއެވެ.
އެމެރިކާގެ ހުށަހެޅުން ޤަބޫލުނުކުރުމަށް ފަލަސްޠީނާއި ޢަރަބި ޤައުމުތަކުންވަނީ ނިންމާފައެވެ.