ޗައިނާގައި ކޮރޯނާވައިރަސް ޖެހިފައިވާ މާބަނޑު އަންހެނަކަށް ޞިއްޙަތު ރަނގަޅު ކުއްޖަކު ލިބިއްޖެއެވެ.
ޗައިނާގެ ޤައުމީ ޓީވީން ބުނީ 33 އަހަރުގެ އަންހެން މީހާ ވިހާފައިވަނީ ޗައިނާގެ ޝީއާންގައެވެ. އެޤައުމުގެ ޝަންގްލޫ ސިޓީގެ ހޮސްޕިޓަލަކުން ޝީއާންގެ ޚާއްޞަ ހޮސްޕިޓަލަކަށް އެއަންހެންމީހާ ބަދަލުކޮށްފައިވަނީ މިމަހު 7ވަނަ ދުވަހުއެވެ. ޚާއްޞަ ޑޮކްޓަރުންގެ ޓީމަކުންވަނީ އޭނާއަށް ދެވޭނެ ފަރުވާތައް ބަލާ، އަންހެންމިހާއާއި ބަނޑުގައި އޮތް ކުއްޖާގެ ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް ކޮށްފައެވެ.
އަންހެންމީހާ ބަނޑަށް 37 ހަފުތާގައި ސިޒޭރިއަންހެދުމަށްފަހު ނެގި ކުއްޖާގެ ހަށިގަނޑުން ކޮރޯނާވައިރަހުގެ އެއްވެސް އަސަރެއް ފެނިފައިނުވާކަމަށް ޝިންހުއާ ނިއުސް އެޖެންސީންވަނީ ބުނެފައެވެ. ވިހޭއިރު 2.730 ކިލޯ ހުރި ތުއްތު ކުއްޖާގެ ގައިން ކޮރޯނާވައިރަހުގެ އަސަރެއް ނުފެނުނުނަމަވެސް ވައިރަހުގެ އަސަރު އެކުއްޖާގެ ހަށިގަނޑުގައި ނެތްކަން ޔަޤީންކުރުމަށް ކުރިއަށް އޮތް ދުވަސްތަކުގައި އިތުރު ތަހުލީލުތައް ކުރާނެކަމަށް ޗައިނާގެ ޕްރޮވިންޝަލް ސެންޓަރ ފޮރ ޑިސީސް ކޮންޓްރޯލް އެންޑް ޕްރިވެންޝަންއާ ހަވާލާދީ އެނޫހުގައި ބުނެފައިވެއެވެ. މިދިޔަ ބުދަ ދުވަހު ޗައިނާގެ ވުހާންގައި ވިހޭ ކުއްޖެއްގެ ގައިން ކޮރޯނާވައިރަސްވަނީ ފެނިފައެވެ.
ވުހާންގެ ބާޒާރަކުން އުފެދި ހަލުވިކަމާއެކު ފެތުރެމުންދާ ކޮރޯނާވައިރަސް ޖެހިގެން މިހާތަނަށް 1،000އަށްވުރެ ގިނަ މީހުންވަނީ މަރުވެފައެވެ.