އިނގިރޭސިވިލާތުގެ މާލީ ވަޒީރުކަމުން އިސްތިޢުދާދެއްވީ އިތުރު ގޮތެއްނެތިގެންކަމަށް އެމަޤާމުން ވަކިވެވަޑައިގެންނެވުމަށްފަހު ސާޖިދު ޖާވިދު ވިދާޅުވެއްޖެއެވެ. އޭނާ އިސްތިޢުފާ ދެއްވާފައިވަނީ އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން އެޤައުމުގެ ވަޒީރުންގެ މަޖިލީހަށް ބަދަލުތަކެއް ގެންނަވާފައިވާ ދަނޑިވަޅެއްގައެވެ.
މަޤާމުން އިސްތިއުފާ ދެއްވުމަށްފަހު ނޫސްވެރިންނާ ވާހަކަދައްކަވަމުން ޖާވިދު ވިދާޅުވީ ޖޮންސަންވަނީ އޭނާގެ ސިޔާސީ މުޝީރުންގެ ޓީމުގެ މެމްބަރުން މަޤާމުން ވަކިކުރުމަށް ޢަމުރުކުރައްވާފައިކަމަށެވެ. އެކަމުގެ ސަބަބުން މާލީ ވަޒީރުކަމުގެ މަޤާމުން އިސްތިޢުފާދެއްވުން ނޫންގޮތެއް ފެނިވަޑައިނުގެންނެވީކަމަށް ޖާވިދު ވިދާޅުވިއެވެ. ޖާވިދު ވިދާޅުވީ އޭނާގެ މުޝީރުންވަނީ ވޭތުވެދިޔަ ދުވަސްތަކުގައި ވަރަށް ބުރަކޮށް މަސައްކަތްކޮށްފައިކަމަށާއި އެމީހުންގެ ބަދަލުގައި އެހެން ބަޔަކު އެމަޤާމުތަކަށް ހަމަޖެއްސުމަށް އެއްބަސްވެވަޑައިނުގަންނަވާކަމަށެވެ.
ޖާވިދު މަޤާމުން އިސްތިޢުފާދެއްވާފައިވަނީ އިނގިރޭސިވިލާތުގެ ޤާނޫނުހަދާ މަޖިލީހަށް ދަޢުލަތުގެ ބަޖެޓު ހުށަހަޅަން ހަތަރު ހަފުތާއަށްވެފައިވަނިކޮށެވެ. ކުރިން ދާޚިލީ ވަޒީރުކަމުގައި ހުންނެވި ޖާވިދު މާލީ ވަޒީރުކަމަށް ހަމަޖައްސަވާފައިވަނީ މިދިޔަ އަހަރުގެ ޖުލައި މަހުއެވެ.