ޗައިނާގައި އާންމު ބޭނުމަށް ބޭނުންވާ ސާމާނު އެކަށީގެންވާ މިންވަރަކަށް އެބަހުރި: ވިޔަފާރިވެރިން
ޒަރޫރީ ބޭނުންތައް ފުއްދުމަށް ބޭނުންކުރާ ސާމާނު ފުދޭ ވަރަށް އެބަހުރިކަމަށް ޗައިނާގެ ވިޔަފާރިއާއިބެހޭ ވުޒާރާއިން ބުނެފިއެވެ. ނުރައްކާތެރި ކޮރޯނާވައިރަސް، ކޯވިޑް-19ގެ ސަބަބުން ބަންދުކޮށްފައިވާ %95 ފިހާރަތަކާއި ސުޕަމާކެޓުތައް އަލުން ހުޅުވިފައިވާކަމަށް އެޤައުމުގެ ރަސްމީ އިދާރާތަކުން ބުނެއެވެ.
ވައިރަސް ފެތުރެންފެށުމުން ދުނިޔޭގެ ދެވަނައަށް އެންމެ ބޮޑު އިޤްތިޞާދު އޮންނަ ޗައިނާއިންވަނީ އެޤައުމަށް އެތެރެކުރާ އޫރުމަހުގެ މިންވަރު %3.5 އިތުރުކޮށްފައެވެ. އަދި ރައްކާކުރެވިފައިވާ 35،000 ޓަނުގެ ފިނިކުރި އޫރުމަސްވަނީ ބާޒާރަށް ނެރެ، އޫރުމަހުގެ އަގުތިރިކުރުމަށް މަސައްކަތްކޮށްފައެވެ. އޫރުމަހާއި ގެރިމަހުގެ އަގު އުފުލިފައިވީނަމަވެސް އެހެން ބާވަތްތަކުގެ މުދަލުގެ އަގު އެފުލޭ މިންވަރުވަނީ ވަރަށް ބޮޑަށް ދަށްވެފައެވެ. ގޮދަނުގެ ބާވަތްތަކާއި ކެއްކުމުގައި ބޭނުންކުރާ ތެލުގެ އަގު ވަނީ އެއްވަރެއްގައި ހިފެހެއްޓިފައެވެ. އަދި ބިހާއި ކުކުޅާއި ތަރުކާރީގެ ބާވަތްތަކުގެ އަގުވަނީ އެކި މިންވަރަށް ދަށްވެފައިކަމަށް ރަސްމީ އިދާރާތަކުން ބުނެއެވެ.
ވިޔަފާރިކުރާ ކުންފުނިތަކުން އަލުން މަސައްކަތް ފަށާ މިންވަރުވަނީ ވަރަށް ބޮޑަށް އިތުރުވެފައެވެ އެގޮތުން، އަވަސް ކާނާ ތައްޔާރުކުރާ %90 ރެސްޓޯރަންޓުތަކާއި އާންމު މުދާ ވިއްކާ %80 ފިހާރަތަކުގެ އިތުރުން ދަންޑުތަކުގައި ހައްދާ ކާނާ ވިއްކާ %80 ވިޔަފާރިތައްވަނީ އަލުން މަސައްކަތްފަށާފައެވެ.
ވިޔަފާރިއާއިބެހޭ ވުޒާރާގެ ޑެޕިއުޓީ ޑިރެކްޓަރު ވާން ބިން ވިދާޅުވީ އިންޓަނެޓު މެދުވެރިކޮށް އެޤައުމުގައި ކުރަމުންދިޔަ ވިޔަފާރިތަކަށް ކޯވިޑް-19ގެ ސަބަބުން ވަރަށް ބޮޑަށް އަސަރުކޮށްފައިވާކަމަށެވެ.