ކޯވިޑް-19އިން ރަނގަޅުވި ދިވެއްސަކު އަނެއްކާވެސް އެބައްޔަށް ޕޮޒިޓިވް ވެއްޖެއެވެ.
ޕޮޒިޓިވްވެފައިވަނީ އާސަންދައިގެ ދަށުން ބޭސްފަރުވާއަށް އިންޑިއާއަށް ގޮސްހުރި ބަލިމީހެއްގެ އެހީތެރެއެކެވެ. އާސަންދަ ކުންފުނިން ވިދާޅުވީ ބަލި މީހެއްގެ އެހީތެރިއެއްގެ ގޮތުގައި އިންޑިއާއަށް ދިޔަ އެ މީހާ ޕޮޒިޓިވްކަން އެނގިފައިވަނީ މިދިޔަ އަންގާރަ ދުވަހު ނެގި ސާމްޕަލުންކަމަށެވެ.
ދެވަނަ ފަހަރަށް ޕޮޒިޓީވްވި މިމީހާ އެންމެ ފުރަތަމަ ކޯވިޑް-19އަށް ޕޮޒިޓިވްވެފައިވަނީ މިދޔަ މެއި މަހުގައެވެ. އާސަންދަ ކުންފުނިން ވިދާޅުވީ އެމީހާ އިންޑިއާއަށް ގޮސްފައިވަނީވެސް ކޯވިޑް-19އަށް ހެދި ޓެސްޓް ޑަބަލް ނެގެޓިވް ވުމުންކަމަށެވެ.
މިމީހާގެ އިތުރަށް އިތުރު އެހީތެރިއަކުވެސް ބައްޔަށް ޕޮޒިޓީވްވެފައިވާކަމަށާ އެ ދެމީހުންގެ ހާލުވެސް ރަނގަޅުކަމަށް އާސަންދައިން ވިދާޅުވިއެވެ.
މިއީ އިންޑިއާއަށް ބޭހަށް ފޮނުވި ދިވެހިންގެ ތެރެއިން ކޯވިޑް-19 ޕޮޒިޓިވްވީ ތިންވަނަ މީހާއެވެ.