މިފްކޯއިން މިދިޔަ ޖުލައިމަހުގެ ތެރޭ ބާޒާރަށް ނެރުނު "ގިތެޔޮ މިރުސް މަސްދަޅު"ގެ ޑިމާންޑު ބޮޑުކަމަށް އެކުންފުނިން ހާމަކޮށްފިއެވެ.
ބާޒާރުން "ގިތެޔޮ މިރުސް މަސްދަޅު" ހުސްވެފައިވާއިރު، މި ހަފްތާގެ ފަހުކޮޅު ގިތެޔޮ މިރުސް މަސްދަޅު ބާޒާރަށް ލިބޭނެކަމަށް މިފްކޯއިން ހާމަކުރެއެވެ.
މިފްކޯގެ ޗީފް އޮޕަރޭޓިން އޮފިސަރ، އިސްމާއިލް ފައުޒީ ވިދާޅުވީ ގިތެޔޮ މިރުސް މަސްދަޅު ފެލިވަރު މަސް ކާރުހާނާގައި ބަންދުކުރަމުން ދަނީ ކޮންމެ ދުވަހެއްގެވެސް މައިގަނޑު މަސްކަތްތައް ނިމުމުންކަމަށެވެ. އަދި މި މަސްދަޅު ތައްޔާރުކުރަނީ ކަނޑޫދޫ މިރުސް ބޭނުންކޮށްގެން ކަމަށްވުމުން، އެ ކާރުހާނާގައި ބަންދުކުރާ އާދައިގެ މަސްދަޅުތަކާއި އަޅާ ބަލާއިރު ކުރަން ޖެހޭ މަސައްކަތް ގިނަކަމަށް ފައުޒީ ފާހަގަކުރިއެވެ.
"ގިތެޔޮ މިރުސް މަސްދަޅު ފެލިވަރުގައި މި ބަންދުކުރެވެނީ ދުވާލެއްގެ މައްޗަށް ގާތްގަނޑަކަށް 90 ކޭސް، އަދި މި އުފެއްދުން ހޯލްސޭލް ކުރެވޭ ވަރަށް ނުއުފެއްދޭ، މިފްކޯ މަސް ފިހާރައަށް ގެންނަ ތަނާ ހުސްވެފައި ހުންނަނީ، ވަރަށް ޑިމާންޑު ބޮޑު މިވަތްތަރުގެ މަސްދަޅަށް،" ފައުޒީ ވިދާޅުވިއެވެ.
މިފްކޯއިން ފަސްމީރު ބްރޭންޑުގެ މަސްދަޅުތަކުގެ ތެރެއަށް "ގިތެޔޮ މިރުސް" މަސްދަޅު ތަޢާރަފްކުރީ މިދިޔަ ޖަލައިމަހުގެ 29ވަނަ ދުވަހުއެވެ. މިފްކޯއިން ގިތެޔޮމިރުސް މަސްދަޅު ވިއްކަނީ ކޭހެއް 670 ރުފިޔާ އަށެވެ. އަދި ވަކިން މަސްދަޅެއް 14.50 ރުފިޔާއަށެވެ.
ފައުޒީ ވިދާޅުވީ މިފްކޯއިން މިހާރުވެސް ދަނީ އިތުރު އާ އުފެއްދުމެއް ބާޒާރަށް ނެރުމަށް ތައްޔާރުވަމުން ކަމަށެވެ. އެގޮތުން ސްމޯކްޑު ޓޫނާ ނުވަތަ ދިލަޖެއްސިމަސް ދަޅުގައި ބަންދުކޮށް ބާޒާރަށް ނެރުމަށް އެކަމާއި ގުޅޭ ޓެސްޓުތައް ހަދަމުންދާ ކަމަށް އޭނާ ވިދާޅުވިއެވެ. އަދި އަންނަމަހު މިބާވަތުގެ މަސްދަޅު ބާޒާރަށް ނެރެވޭނެ ކަމަށް ލަފާ ކުރެވޭ ކަމަށްވެސް ފައުޒީ ވިދާޅުވިއެވެ.
މިފްކޯއިން ދަނީ ރާއްޖޭގެ ބާޒާރަށް ނެރޭ މަހުގެ އުފެއްދުންތަކުގެ އިތުރުން ރިސޯޓު، ހޮޓާތަކަށް ހާއްސަ ތަކެތި އަދި ރާއްޖެއިން ބޭރުގެ ބާޒާރަށް ހާއްސަކޮށްވެސް މަހުގެ އުފެއްދުންތައް ތަޢާރަފްކުރަމުންނެވެ.