ބައިނަލްއަޤްވާމީ މިންގަނޑުތަކަށް ފެތޭގޮތަށް މިހާތަނަށް 19 ސަރަހައްދެއް ހިމާޔަތްކޮށްފައިވާކަމަށް އެންވަޔަރަންމަންޓް މިނިސްޓްރީން ވިދާޅުވެއްޖެއެވެ.
ސަރުކާރުގެ ސްޓްރެޓެޖިކް އެކްޝަން ޕްލޭންގެ އަމާޒުތަކުގެ ތެރޭގައި ވަނީ ކޮންމެ އަތޮޅަކުން މަދުވެގެން 1 ރަށާއި 1 ފަރާއި 1 ކަނޑޫފާ ހިމާޔަތްކުރުމަށް ނިންމާފައެވެ. މި ސިޔާސަތު ތަންފީޒު ކުރުމުގެ ގޮތުން 2018 ވަނަ އަހަރުންފެށިގެން މިއަދާ ހަމަޔަށް ވަނީ 19 ސަރަޙައްދެއް ހިމާޔަތްކޮށްފައެވެ.
އެންވަޔަރަންމަންޓް މިނިސްޓްރީން ވިދާޅުވީ މި މަސައްކަތުގެ ދަށުން މިހާތަނަށް 6 އަތޮޅަކުން 11 ފަރު ފަޅު ހިމާޔަތްކޮށްފައިވާކަމަށެވެ. އަދި 5 އަތޮޅަކުން 7 ރަށް ހިމާޔަތްކުރުމުގެ އިތުރުން 5 އަތޮޅަކުން 7 ކުޅީ ފާ ބިންވެސްވަނީ ހިމާޔަތްކޮށްފައެވެ. އެއީ މުޅި ޖުމުލަ 10051 ހެކްޓަރުގެ ސަރަޙައްދުކަމަށް އެންވަޔަރަންމަންޓް މިނިސްޓްރީން ވިދާޅުވެއެވެ.
ރާއްޖޭގެ އެކި ސަރަޙައްދުތައް ހިމާޔަތްކުރުމަށް ކުރަމުންދާ މަސައްކަތްތަކުގެ ދަށުން ދާދިފަހުން ވަނީ އައްޑޫ ސިޓީގެ 4 ސަރަޙައްދެއް ހިމާޔަތްކޮށްފައެވެ. އަދި ޅ އަތޮޅުގައި ހިމެނޭ 5 ސަރަހައްދެއްވެސް ވަނީ ހިމާޔަތްކޮށްފައެވެ.
މި ތަންތަން ހިމާޔަތްކުރުމުގެ ކަންކަން ކުރިއަށް ގެންދަވާއިރު، ޢުމްރާނީ ތަރައްޤީއާ ގުޅޭ މަޝްރޫޢުތަކަށް ހުރަސްނޭޅޭނެ ފަދަ ގޮތަކަށް ކަންކަން ހަމަޖައްސަވާނެކަމަށް އެންވަޔަރަންމަންޓް މިނިސްޓްރީން ވިދާޅުވެއެވެ. އަދި މިތަންތަން ހިމާޔަތްކުރުމުން މިކަމުގެ ފައިދާ އަންނަން އޮތް ޖީލުތަކަށް ލިބުމާއެކު، އިކޯ ޓޫރިޒަމާއި، އިންޓަރގްރޭޓެޑް ޓޫރިޒަމާއި، ދިރުން ހުރި އިޤްތިޞާދީ ހަރަކާތްތަކަށް މަގުފަހިވެގެންދާނެކަމަށްވެސް އެންވަޔަރަންމަންޓް މިނިސްޓަރ ޑރ.ހުސައިން ރަޝީދު ޙަސަން ވަނީ ވިދާޅުވެފައެވެ.