ރާއްޖޭގެ ރަށްރަށުގެ ނަލަކަން ދެމެހެއްޓުމަށް ސާފުތާހިރުކަމަށް ޚާއްސަ އިސްކަމެއް ދިނުމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ގޮވާލައްވައިފިއެވެ.
އެމަނިކުފާނު މިކަމަށް ގޮވާލައްވާފައިވަނީ ހުޅުމާލެ ސާފުކުރުމަށް މިއަދު ހަވީރު "ސާފު ހުޅުމާލެ"މިނަމުގައި ކުރިއަށްގެންދިޔަ ޚާއްސަ ހަރަކާތް ރަސްމީކޮށް ފަށްޓަވައިދެއްވާ ދެއްކެވި ވާހަކަފުޅުގައެވެ.
ހުޅުމާލޭ ރުއްގަނޑު-1 ސަރަހައްދުން ފެށި މިޙަރަކާތް ރައީސުލްޖުމްހޫރިއްޔާގެ ނައިބު ޝަރަފުވެރިކޮށްދެއްވާފައިވާއިރު، މި ޙަރަކާތުގައި އެންވަޔަރަމަންޓް މިނިސްޓަރ ޑރ.ޙުސައިން ރަޝީދު ޙަސަނާއި، އިސްލާމިކް މިނިސްޓަރ ޑރ.އަޙްމަދު ޒާހިރުގެ އިތުރުން ރައްޔިތުންގެ މަޖިލީހުގެ ހުޅުމާލޭ ދާއިރާގެ މެމްބަރު ޢަލީ ނިޔާޒްވެސް ވަނީ ބައިވެރިވެވަޑައިގެންފައެވެ.
މި ހަރަކާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވެރިކަމާއި ހަވާލުވެވަޑައިގަތުމަށްފަހު އެންމެ ފުރަތަމަވެސް ބޮޑު ހަރަކާތެއްގެ ގޮތުގައި ފައްޓާފައިވަނީ 2018ވަނަ އަހަރުގެ ޑިސެމްބަރުމަހުގެ 18ވަނަ ދުވަހު މުޅި ރާއްޖެ ސާފުކުރުމުގެ ހަރަކާތެއްކަމަށެވެ. އަދި އެކަމުންވެސް މިހާރުގެ ރައީސުލްޖުމްހޫރިއްޔާއާއި ސަރުކާރުން ތިމާވެށީގެ ކަންކަމަށާއި ސާފުތާހިރުކަމަށް އިސްކަންދޭ މިންވަރު ހާމަވާކަމަށް އެމަނިކުފާނު ވިދާޅުވިއެވެ.
ނައިބު ރައީސް ވިދާޅުވީ، ދިވެހިންނަކީ ޒަމާނުއްސުރެ ސާފުތާހިރުކަމަށް ވަރަށް ބޮޑަށް ލޯބިކުރާ ބައެއްކަމަށާއި، ރާއްޖޭގެ ޖަޒީރާވަންތަކަމުގެ އަސްލަކީވެސް ސާފުތާހިރުކަންކަމަށެވެ. އަދި ފަތުރުވެރިކަމުގެ ދާއިރާއަށް ބަލާލިކަމުގައިވިޔަސް، އެ ސިނާޢަތް ކުރިއެރުމުގައި ސާފުތާހިރުކަމަށްދޭ އިސްކަން ބޮޑު ދައުރެއް އަދާކުރާކަން އެމަނިކުފާނު ފާހަގަކުރެއްވިއެވެ.
ނައިބު ރައީސް ފައިޞަލް ނަސީމް ވިދާޅުވީ، ރާއްޖެއަކީ ތިމާވެއްޓާއި މޫސުމީ ބަދަލުތަކާގުޅޭގޮތުން އަބަދުވެސް ވަކާލާތުކުރަމުންދާ ޤައުމެއްކަމަށެވެ. އަދި ސިންގަލް ޔޫސް ޕްލާސްޓިކް ނުވަތަ އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ދިވެހިރާއްޖޭގައި ބޭނުންކުރުން ހުއްޓާލުމަށް ސަރުކާރުން ހިފާފައިވާ އަމާޒު ޙާޞިލުކުރުމުގައި ފަރުދީ ޒިންމާއާއި އާއްމުންގެ އެއްބާރުލުން ވަރަށް ބޮޑަށް ބޭނުންވާކަން އެމަނިކުފާނު ވަނީ ފާހަގަކުރައްވާފައެވެ.
"ހުޅުމާލެވެސް މި އަންނަނީ އެކި ޑިޒައިންތަކަކަށް ހުރި އިމާރާތްތަކަކާއެކު ތަރައްޤީވަމުން. ނަމަވެސް ރީތިވާނީކީ ހަމައެކަނި އިމާރާތްތަކެއް ހުރުމަކުންނެއްނޫން. އެހެންކަމުން ސާފުތާހިރުކަމަށް ވަރަށް ބޮޑަށް އިސްކަންދިނުމަށް އަޅުގަނޑު ގޮވާލަން. ރާއްޖޭގެ ރަށްރަށުގެ ނަލަކަން ދެމެހެއްޓުމަށް އެކި ތަންތަނަށް ކުނި އެޅުން ހުއްޓާލަން އެބަޖެހޭ. އަދި މިކަމުގައި ފަރުދީ ޒިންމާ ކުރިއަށް އެބަނެރެންޖެހޭ. ކޯވިޑް-19 އިންވެސް އަޅުގަނޑުމެންނަށް އެންމެ ބޮޑަށް ދަސްކޮށްދިނީ ސާފުތާހީރުކަމަށް އިސްކަން ދިނުމުގެ މުހިއްމުކަން" ނައިބު ރައީސް ވިދާޅުވިއެވެ.
މި ހަރަކާތާއި ގުޅޭގޮތުން ވާހަކަދައްކަވަމުން އެޗް.ޑީ.ސީގެ މެނޭޖިންގ ޑިރެކްޓަރ ސުހައިލް އަޙްމަދު ވިދާޅުވީ، ހުޅުމާލެއަކީ ސާފު އަދި ހިތްގައިމު ސިޓީއަކަށް ހެދުމަށް ސާފުކުރުމުގެ ހަރަކާތްތައް ސިލްސިލާގޮތެއްގައި އެކޯޕަރޭޝަނުން އަބަދުވެސް ކުރިއަށްގެންދާކަމަށެވެ. ނަމަވެސް ކޯވިޑް-19ގެ ސަބަބުން އެ މަސައްކަތްތައް ހުއްޓިފައިއޮތުމަށްފަހު އަލުން މިފަދަ ހަރަކާތްތެއް ފެށިގެން ދިއުމަކީ އުފާކުރާކަމެއްކަމަށެވެ.
"އަޅުގަނޑުމެން ޝެޑިއުލްކޮށްގެން އަބަދުވެސް ކުރިއަށް ގެންދަން ހަޑިވެފައި ހުންނަ ތަންތަން ސާފުކުރުމުގެ އެކި ޕްރޮގްރާމްތައް. ކޯވިޑް-19ގެ ސަބަބުން ވަރަށް ގިނަ ދުވަސްވެއްޖެއް މިކަހަލަ ހަރަކާތެއް ކުރިއަށްނުގެންދެވޭތާ. އެކަމުގެ ސަބަބުން ހުޅުމާލޭގެ ބައެއް ތަންތަނަށް ގިނަ ކުނިތަކެއް އެޅި، ވަރަށް ހަޑިވެފައިވާކަން އަޅުގަނޑުމެންނަށްވަނީ ފާހަގަކުރެވިައި. ވަރަށް ބޮޑު އެދުމެއް އެޗްޕީއޭގެ ގައިޑްލައިނާ އެއްގޮތަށް އިޖްތިމާޢީ ގައިދުކުރަމާއެކު މި ހަރާކަތް ކުރިއަށްގެންދިއުން" ސުހައިލް ވިދާޅުވިއެވެ.
"ސާފު ހުޅުމާލެ" މި ހަރަކާތަކީ ހުޅުމާލެއަކީ ސާފު ސިޓީއަކަށް ހަދާ، ރައްޔިތުންގެ ހިތުގައި ތިމާވެއްޓަށް އޮންނަ ލޯބި އިތުރުކުރުމަށް އެޗް.ޑީ.ސީން ފެށި ހަރަކާތެކެވެ. އެގޮތުން މި ހަރަކާތުގައި ހުޅުމާލޭގައި އާއްމުކޮށް ކުނިއަޅާ ހަޑިކޮށްފައިވާ 20 ސަރަޙައްދެއް ސާފުކުރުމަށް ހަމަޖެހިފައިވާކަމަށް އެޗް.ޑީ.ސީން ވިދާޅުވެއެވެ. އަދި ތިމާވެއްޓަށް ރައްޔިތުން އަހުލުވެރިކުރުވުމަށް މިފަދަ އިތުރު ހަރަކާތްތައް ކުރިއަށްއޮތްތާނގައިވެސް ބާއްވާނެކަމަށް އެކޯޕަރޭޝަނުން ވިދާޅުވެފައިވެއެވެ.