ބައެއް ފިހާރަތަކުގައި ގަނޑުކުރި އަދި ފިނިކުރި ކާބޯތަކެތި ވިއްކަމުންދަނީ ފިނިހޫނުމިން ބަހައްޓަންޖެހޭ މިންގަނޑުތަކާއި ޚިލާފަށްކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ހާމަކޮށްފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީން ވަނީ ފިހާރަތަކުގައި ގަނޑުކުރި އަދި ފިނިކުރި ކާބޯތަކެތި ބަހައްޓަމުންދާ ގޮތް ބެލުމަށް އިންސްޕެކްޝަނެއް ކުރިއަށް ގެންގޮސްފައެވެ. އަދި އެ އިންސްޕެކްޝަންގައި ނެގި ސާމްޕަލްތައް ތަޙުލީލުކޮށް ބެލި ބެލުމުގައި މިފަދަ އުފެއްދުންތަކުގެ ފިނިހޫނުމިން ބަހައްޓަންޖެހޭ މިންގަނޑުގައި ބަހައްޓާފައިނުވާކަން ފާހަގަކުރެވިފައިވާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ، އެފްޑީއޭއިން ބުނެއެވެ.
ގަނޑުކުރި އަދި ފިނިކުރި ކާބޯތަކެއްޗަކީ ކަނޑައެޅިފައިވާ ވަކި ފިނިހޫނުމިނެއްގައި ބަހައްޓަންޖެހޭ ތަކެތި ކަމުން އޭގެ ފިނިހޫނުމިނަށް ބަދަލު އަތުވެއްޖެނަމަ އޭގެ ފެންވަރާއި ރައްކާތެރިކަން ގެއްލޭނެކަމަށް އެފްޑީއޭއިން ބުނެއެވެ. އަދި މިއީ ޢާއްމު ޞިއްޙަތަށް ނުރައްކާވާ ކަމަކަށްވާތީ މިފަދަ ތަކެތި ރައްކާކޮށް ގުދަން ކުރުމުގައާއި އަދި ވިއްކަން ބެހެއްޓުމުގައި ސަމާލުވުމަށް ފުޑް އެންޑް ޑްރަގް އޮތޯރިޓީންވަނީ އަންގާފައެވެ.
އެފްޑީއޭއިން ބުނީ ގަނޑުކުރި ކާބޯތަކެތީގެ ފިނިހޫނުމިން -18°C އަށްވުރެ މަތިނުވާނެ ގޮތަކަށް އަދި ފިނިކުރި ކާބޯތަކެތި 0-5°C އާއި ދެމެދުގައި ބެހެއްޓުމަށް އެ އޮތޯރިޓީން އަންގާފައިވާކަމަށެވެ.