މިމަހުގެ 31 ވަނަ ދުވަހުން ފެށިގެން އައިޖީއެމްއެޗްގެ ޚިދުމަތްތަކަށް ވަގުތީ ގޮތުން ބަދަލުތަކެއް ގެނައުމަށް ނިންމައިފިއެވެ.
އައިޖީއެމްއެޗުން މިގޮތަށް ނިންމާފައިވަނީ ކޯވިޑް-19 ބަލިޖެހޭ މީހުންގެ އަދަދު އަނެއްކާވެސް އިތުރުވަމުން ދިއުމާއިގުޅިގެން ބަލި ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތްތަކައް އެއްބާރުލުން ދިނުމުގެ ގޮތުން ކަމަށް އެ ހޮސްޕިޓަލުން ވިދާޅުވެއެވެ.
މިގޮތުން އައި.ޖީ.އެމް.އެޗް އާއި ދަރުމަވަންތަ ހޮސްޕިޓަލަށް ވަންނަ ބަލިމީހުން ހުމާއި ރޯގާ ހުރިތޯ ބެލުމަށް ދޮރުމަތީގައި ސްކްރީން ކުރުމާއި އޯ.ޕީ.ޑީ އަށް ޑޮކްޓަރަށް ދައްކަން އަންނަ ބަލިމީހުން ހުމާއި ރޯގާއަށް ސްކްރީން ކުރުމަށް ވަނީ ހަމަޖެހިފައެވެ. އަދި މިއިން އެއްވެސް ހާލަތެއްގައި ހުމާއި ރޯގާގެ އަލާމާތްތައް ހުރިނަމަ ފްލޫ ކްލިނިކަށް ދިއުމަށް އިރުޝާދު ދޭނެކަމަށް ހޮސްޕިޓަލުން ވިދާޅުވެއެވެ. މީގެ އިތުރުން ދުރާލާ ރާވައިގެން އާއްމުކޮށް ކުރަމުން އަންނަ އޮޕަރޭޝަންތައް މަދުކުރުމާއި ގިނަ އޯ.ޕީ.ޑީތަކުގައި ބަލިމީހުން ބެލުން ހެނދުނު 8 ން މެންދުރު 2 އާއި ދެމެދަށް ކުރުކުރުމަށް ވަނީ ނިންމާފައެވެ. އައިޖީއެމްއެޗްއިން ވިދާޅުވީ އޯ.ޕީ.ޑީ ވެއިޓިންގ އޭރިއާގައި އެއްވަގުތެއްގައި މަޑުކުރާ ބަލިމީހުން މަދުކުރުމުގެގޮތުން އެކި ގަޑިތަކަށް ބަހާލައިގެން އެޕޮއިންޓްމަންޓްތަކަށް ބަލިމީހުން ގެނައުމަށް ހަމަޖެހިފައިވާކަމަށެވެ.
ހޮސްޕިޓަލުގެ ޚިދުމަތްދޭ ގޮތްތަކަށް ވަގުތީ ގޮތުން ބަދަލުތަކެއް ގެނެސްފައިވަނީ އާއްމު ރައްޔިތުންނާއި ޞިއްޙީ ޚިދުމަތްތެރިންގެ ސަލާމަތާއި ރައްކާތެރިކަމަށްޓަކައެވެ. އަދި މި ބަދަލުތައް ގެނައިނަމަވެސް ކުއްލި ހާލަތުގައި ފަރުވާ ހޯދަން ޖެހޭ ބަލިމީހުންނަށް އިމަރޖެންސީ ޑިޕާޓްމަންޓުން 24 ގަޑިއިރު ފަރުވާ ލިބެމުންދާނެ ކަމަށް ހޮސްޕިޓަލުން ވިދާޅުވެއެވެ.
އައިޖީއެމްއެޗް އަކީ ކޮންމެ ދުވަހަކުވެސް ގިނަ އަދަދެއްގެ ބަޔަކު ޑޮކްޓަރަށް ދެއްކުމަށްޓަކައި ދާ ހޮސްޕިޓަލެކެވެ. ކޯވިޑް-19 އާ ގުޅިގެން ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތަކާއި އަދި ބަލި ކޮންޓްރޯލް ކުރުމަށްޓަކައި އެ ހޮސްޕިޓަލުން މީގެ ކުރިންވެސް ވަނީ ބައެއް ޚިދުމަތްތައް ދިނުމުގައި ބަދަލުތަކެއް ގެނެސްފައެވެ.