ތ. އަތޮޅުގެ އިތުރު ދެ ރަށެއްގައި ރިސޯޓު ތަރައްޤީކުރުމަށް ހުޅުވާލުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ އެމްޑީޕީން ކުރިއަށްގެންދާ "ރަށްވެހި ފަތިސް" ކެމްޕެއިނުގައި ތ.އަތޮޅަށް ޚާއްސަކޮށްގެން ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
ރައީސް ޞާލިޙް ވިދާޅުވީ ތ. އަތޮޅު ކާއްޑޫއާއި އޮޅުފުށީގައި ރިސޯޓް ތަރައްޤީކުރުމަށް ހަމަޖެހިފައިވާކަމަށެވެ. އަދި ތ.އަތޮޅުގައި ރިސޯޓު ތަރައްޤީކުރުމަށް މިހާރު ދޫކޮށްފައިހުރި ރަށްތަކުގެ ތެރެއިން ބައެއް ރަށްތަކުގެ މަސައްކަތް ކުރިއަށް ނުދާކަމަށެވެ.
"ތ.އަތޮޅުން ޓޫރިޒަމަށް ދޫކޮށްފައިއޮތް 5 ރަށެއް އެބައޮތް ނުހެދި، އަޅުގަނޑުމެން އިތުރު ދެ ރަށެއް ރިސޯޓް ތަރައްޤީކުރަން ހުޅުވާލާނަން، އެއީ ކާއްޑޫ އާއި އޮޅުފުށި، އަދި މިހާރު ރިސޯޓް ތަރައްޤީކުރަން ދޫކޮށްފައި އޮތް 5 ރަށާމެދު ގޮތެއް ނިންމާނަަން،" ރައީސް ޞާލިޙް ވިދާޅުވިއެވެ.
"ރަށްވެހި ފަތިސް" ކެމްޕެއިނުގައި ތ.އަތޮޅަށް ޚާއްސަކޮށްގެން ބޭއްވި ބައްދަލުވުމުގައި ތ.އަތޮޅުން ވާހަކަދެއްކި ގިނަ ފަރާތްތަކުންވެސް ވަނީ އެ އަތޮޅުގައި ރިސޯޓްތައް މަދުވުމުން ވަޒީފާގެ ފުރުސަތުތައް މަދުކަން ފާހަގަކޮށްފައެވެ.
ތ. އަތޮޅުގައި މި ވަގުތު އޮތީ އެންމެ ރިސޯޓެކެވެ. އެއީ ސިންގަޕޫރުގެ ކޯމޯ ހޮޓެލްސް އެންޑް ރިސޯޓުން ތަރައްގީކޮށް ހިންގާ ފަސް ތަރީގެ ރިސޯޓެކެވެ.
ރިސޯޓް ތަރައްޤީކުރަން ދޫކޮށްފައިވާ ރަށްތަކުގެތެރެއިން މަސައްކަތްތައް ކުރިއަށް ނުދާ ރަށްތަކުގެ މަސައްކަތްތައް ހަލުވި ކުރުމަށް ސަރުކާރުންދަނީ ގިނަ މަސައްކަތްތަކެއް ކުރައްވަމުންނެވެ.