ދައުލަތުގެ ބެލުމުގެ ދަށުގައި ތިބޭ ކުޑަކުދިން ބެލެހެއްޓުމަށް ހުޅުމާލޭގައި ހަދާފައިވާ ފިޔަވަތި ޢިމާރާތް މަރާމާތުކުރުމުގެ މަޝްރޫއު ނިމި، އެތަން ހުޅުވައިފިއެވެ.
މި މަޝްރޫޢުގެ ނިމުން ފާހަގަކުރުމަށް ފޮރިން މިނިސްޓްރީގައި ބޭއްވި ރަސްމިއްޔާތުގައި ފޮރިން މިނިސްޓަރ ޢަބްދުﷲ ޝާހިދާއި އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރްގެ އިތުރުން އަދި މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ސްޓޭޓް މިނިސްޓަރުން އާއިޝަތު ރަޝީދު އަދި ޒިފްލީނާ ހަސަން ވަނީ ބައިވެރިވެވަޑައިގެންފައެވެ.
މި ރަސްމިއްޔާތުގައި ވާހަކަފުޅުދައްކަވަމުން ފޮރިން މިނިސްޓަރ ޝާހިދު ވަނީ ކުޑަކުދިންނަށް ކުރިމަތިވާ ނުރައްކާތަކުން އެކުދިން ސަލާމަތް ކުރުމަކީ މުޖުތަމަޢުގެ މައްޗަށް އޮތް ޒިންމާއެއްކަމަށާއި، މުޖުތަމަޢުގައި ނުރައްކަލާއި ކުރިމަތިލާން ޖެހިދާނެފަދަ ހާލަތެއްގައި ތިބި ކުޑަ ކުދިންނަށް އެ ރައްކާތެރިކަން ހޯދައި ދިނުމަކީ ދައުލަތުގެ ޒިންމާއެއްކަން ފާހަގަކުރައްވާފައެވެ އަދި ފިޔަވަތި އަލުން މަރާމާތުކޮށް، ރައްކާތެރި ވެއްޓެއް ޤާއިމުކޮށް ދިނުމަކީ މި މަޤްޞަދަށް ވާސިލުވުމަށް ސަރުކާރުން ކުރާ މަސައްތުގެ ބައެއްކަމަށް މިނިސްޓަރ ޝާހިދު ވިދާޅުވިއެވެ.
"ކުޑަކުދިން ހެދި ބޮޑުވާއިރު އިޖްތިމާޢީ ހުނަރު ދަސްކޮށް، ކުޅުމުގެ ތެރެއިން އުނގެނި، ރަނގަޅުވެއްޓެގައި ފުރިހަމަ ތަރުބިއްޔަތެއް ލިބެން ޖެހޭ. ސަރުކާރުން ޚާއްސަ އިސްކަމެއް ދީގެން މި ޕްރޮޖެކްޓް ކުރިއަށް ގެންގޮސްފައިވަނީ މި ތަރުބިއްޔަތު ފޯރުކޮށްދިނުމުގައި އެހީތެރިވެ، ކުޑަކުދިންނަށް ދޭންޖެހޭ ސަމާލުކަމާއި އަޅާލުން ލިބުން ކަށަވަރު ކުރުމުގެ ގޮތުން" މިނިސްޓަރ ޝާހިދު ވިދާޅުވިއެވެ.
ރާއްޖޭގެ އެކި ކަންކޮޅުތަކުގައި އިޖްތިމާޢީ ގޮތުން މުހިންމު މިފަދަ ޕްރޮޖެކްޓްތައް ކުރިއަށް ގެންދިޔުމަށް އިންޑިއާ ސަރުކާރުން ވެދެއްވާ އެހީތެރިކަމަށްޓަކައި ފޮރިން މިނިސްޓަރ ވަނީ ޝުކުރު އަދާކުރައްވާފައެވެ.
މި ރަސްމިއްޔާތުގައި ވާހަކަދައްކަވަމުން އިންޑިއާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރު ވިދާޅުވީ، ފިޔަވަތި މަރާމާތުކޮށް އިތުރަށް ތަނަވަސް ކުރުމަށް ހިންގުނު ޚާއްސަ މަޝްރޫޢުގެ އަމާޒަކީ ކުޑަކުދިން ހެދިބޮޑުވެ، ދިރިއުޅުމަށް އެކަށީގެންވާ "ކޮންޑިއުސިވް ހޯމް އެންވަޔަރަމަންޓް"އެއް ގާއިމްކުރުންކަމަށެވެ. އަދި ދައުލަތުގެ ބެލުމުގެ ދަށުގައި ތިބޭ ކުޑަކުދިންނަށް ރައްކާތެރި މާހައުލެއް ކަށަވަރުކޮށްދިނުމަށް މަސައްކަތްކުރާ ފިޔަވަތިއާއި ގުޅިގެން މިފަދަ މަޝްރޫޢުއެއް ކުރިއަށް ގެންދެވުނުކަމީ އިންޑިއާއިން ފަހުރުވެރިވާ ކަމެއްކަމަށްވެސް ސަފީރު ވިދާޅުވިއެވެ.
ފިޔަވަތި މަރާމާތުކޮށްފައިވަނީ އިންޑިއާ ސަރުކާރުން ހިލޭއެހީގެ ގޮތުގައި 2019 ވަނަ އަހަރު ރާއްޖެއަށްދިން 6.9 މިލިއަން ޑޮލަރު (106 މިލިއަން ރުފިޔާ)ގެ އެހީގެ ދަށުންނެވެ. އެގޮތުން މި މަޝްރޫޢަށް 1.9 މިލިއަން ރުފިޔާ ޚަރަދުވެފައިވާކަމަށް ފޮރިން މިނިސްޓްރީން ވިދާޅުވެއެވެ.
މި މަޝްރޫއުގެ ދަށުން ކޮށްފައިވާ މަސައްކަތްތަކުގެ ތެރޭގައި ފިޔަވަތީގެ ވެލްކަމިން އޭރިއާ ތަރައްޤީކުރުމާއި، އިމާރާތުގެ ސެކިއުރިޓީ ނިޒާމު ތަރައްޤީކުރުމާއި، ތުއްތުކުދިން ކުޅޭ އޭރިއާއެއް ގާއިމްކުރުމަށް ފެންޑާއެއް ބިނާކުރުން ހިމެނެއެވެ. އަދި ފާރުތަކުގައި ކުޑަކުދިންނާއި ގުޅޭ ކުލަތައް ލުމާއި، ކޮމްޕިއުޓަރ ސިސްޓަމްތަކާއި، ޕްލޭ ސްޓޭޝަންތައް ގާއިމްކުރެވިފައިވާ ކޮމަން ރޫމްތައް ބިނާކުރުމާއި، ބަގީޗާ ސަރަހައްދުގައި އިތުރު ބެންޗުތައް ބެހެއްޓުމާއި، ބަގީޗާގައި ގަސް އިންދުމާއި، އިމާރާތަށް ބޭނުންވާ ފަރުނީޗަރު ފޯރުކޮށްދިނުންވެސް ހިމެނެއެވެ.
މި މަޝްރޫޢުގެ ސަބަބުން ފަޔަވަތީގައި ދިރިއުޅޭ ކުދިންނަށް އެކުދިން ގަޔާވާ ހިތްފަސޭހަ މާހައުލެއް ޤާއިމުވެގެންދާނެކަމަށް ފޮރިން މިނިސްޓްރީން ވިދާޅުވެއެވެ.