ފަންނުވެރިކަން ކުރިއެރުވުމަށް ރާއްޖޭގެ އެކި ހިސާބުތަކުގައި މަރުކަޒުތަކެއް ޤާއިމްކޮށް ހުނަރުވެރި ކުރެހުންތެރިން ބިނާކުރުމުގެ މަސައްކަތް ކުރައްވާނެކަމަށް ފަންނާއި ސަޤާފަތާއި ތަރިކައާބެހޭ ވަޒީރު ޔުމްނާ މައުމޫނު ވިދާޅުވެއްޖެއެވެ.
މިނިސްޓަރ ވަނީ ދުނިޔޭގެ ކުރެހުމުގެ ދުވަހުގެ މުނާސަބަތުގައި ކުރެހުމުގެ ފަންނު އުނގަންނައިދެއްވުގެ މަސައްކަތްކުރައްވާ އެންމެހައި ބޭފުޅުންނަށާއި، އާޓް ގެލެރީތައް ހިންގަވާ ބޭފުޅުންނަށާއި، މި ފަންނަށް ޝައުޤުވެރިވާ ހުރިހާ ފަރާތްތަކަށް ތަހުނިޔާ ފޮނުއްވާފައެވެ.
ދުނިޔޭގެ ކުރެހުމުގެ ދުވަހުގެ މުނާސަބާގައި މިނިސްޓަރ ޔުމްނާ ދެއްވި ޚިޠާބުގައި ވިދާޅުވެފައިވަނީ ދިވެހިރާއްޖެއަކީ ދުނިޔޭގެ ނިސްބަތުން ބަލާއިރު ގިނަ ޢަދަދެއްގެ މޮޅު ކުރެހުންތެރިން ތިބި ޤައުމެއްކަމަށެވެ. ކުރެހުމާއި، އެއާ ގުޅުންހުރި ދާއިރާތައް ތަރައްޤީ ކުރުމަށް އަދުގެ ސަރުކާރުން ގިނަ މަސައްކަތްތަކެއް ކުރިއަށްގެންދަވާކަން ޔުމްނާ ވަނީ ފާހަގަކުރައްވާފައެވެ.
އެ ގޮތުން ނޭޝަނަލް އާޓް ގެލެރީ ރަނގަޅު ފެންވަރަކަށް ތަރައްޤީ ކުރެއްވުމުގެ މަސައްކަތް ކުރައްވަމުންދާކަމަށާ، ދިވެހި ކުރެހުންތެރީންނަށް އެކިއެކި އެކްސްޗޭންޖް ޕްރޮގްރާމްތައް މެދުވެރިކޮށް ރާއްޖެއިން ބޭރުން ތަމްރީނާއި ތަޖުރިބާ ހޯދުމުގެ ފުރުޞަތު ފަހިކޮށްދެއްވުމަށް މަސައްކަތް ކުރައްވަމުންދާކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ރާއްޖޭގެ އެކިހިސާބުތަކުގައި ފަންނުވެރިކަން ކުރިއެރުވުމަށް މަރުކަޒުތަކެއް ޤާއިމް ކުރެއްވުމުގެ މަސައްކަތް ރާއްވަވާފައިވާކަމަށެވެ. އަދި އެ މަރުކަޒުތައް މެދުވެރިކޮށް، ރާއްޖޭގެ އެކި ހިސާބުތަކުގައި ހުނަރުވެރި ކުރެހުންތެރިން އުފެއްދުމުގެ މަސައްކަތް ކުރައްވާނެކަމަށްވެސް މިނިސްޓަރ ވިދާޅުވިއެވެ.
ކުރެހުންތެރިންނާއި އެހެނިހެން ފަންނާނުންނަށް ލިބެންޖެހޭ ޙައްޤުތަކާއި، އިޙްތިރާމާއި ޙައިސިއްޔަތު ހޯދައިދިނުމަށް ފަންނުވެރިންގެ ޙައްޤުތަކުގެ ޤާނޫނެއް އެކުލަވައިލުމުގެ މަސައްކަތް މިހާރު އަންނަނީ ކުރަމުންނެވެ. އެކަމަށް ރިޔާއަތްކޮށް މިނިސްޓަރ ވިދާޅުވީ ޤާނޫނީ ދާއިރާގެ ތެރެއިން ކުރެވޭ މިފަދަ މަސައްކަތްތަކުން ކުރެހުންތެރިންނަށާއި އެހެނިހެން ފަންނާނުންނަށް އިތުރު ފުރުޞަތުތައްލިބި، ޢާމްދަނީ ހޯދުމުގައްޔާއި، ފިކުރީ މުދާ ރައްކާތެރިކުރުމުގައި ލުއިތަކެއް ލިބިގެންދާނެކަމަށެވެ.
ދުނިޔޭގެ ކުރެހުމުގެ ދުވަހުގެ ގޮތުގައި އޭޕްރިލް މަހުގެ 15ވަނަ ދުވަސް ކަނޑައެޅުނީ 2019ވަނަ އަހަރު ބޭއްވި ޔުނެސްކޯގެ ޢާންމު ޖަލްސާގައެވެ. މިދުވަސް ފާހަގަކުރުމުގެ ބޭނުމަކީ މުޖުތަމަޢާ ކުރެހުމާ ހުރިގުޅުން ފާހަގަކޮށް، ކުރެހުން މެދުވެރިކޮށް ފާޅުކުރެވޭ ޚިޔާލުތަކުގެ ސިންދަފާތުކަން ބަލައިގަނެ، ދެމެހެއްޓެނިވި ތަރައްޤީގައި ކުރެހުންތެރިން އަދާކުރާ މުހިންމު ރޯލު ފާހަގަ ކުރުމެވެ. އަދި ހަމަ މިއާއިއެކު މި ދުވަސް ފާހަގަކުރުމުގެ އެންމެމުހިންމު އެއް ބޭނުމަކީ ބޮޑުވަމުން އަންނަ ކުދީންގެ ތަފާތުތައް ދެނެގަނެ، އެކުދިންގެ ޝުޢޫރުތައް ފާޅުކުރުމަށް ބޭނުންކުރާ ވަސީލަތެއްގެ ގޮތުގައި ކުރެހުން ބޭނުން ކުރުމަށް ސްކޫލް ދައުރުން ފެށިގެން އެ ކުދީންނަށް އެހީވުމުގެ މުހިއްމުކަން ފާހަގަކުރުމެވެ.
މިއީ މި ދުވަސް ދުނިޔޭގެ ފެންވަރުގައި ފާހަގަކުރާ 2ވަނަ އަހަރު ކަމުގައި ވާއިރު، މިއަދު ދުނިޔެއަށް ކުރިމަތިވެފައިވާ ކޯވިޑް-19ގެ ޢާލަމީ ވަބާއާއެކު ކުރެހުންތެރީންނަށް ވަނީ އެތައް ދަތިތަކެއް ކުރިމަތިވެފައެވެ. އެހެންނަމަވެސް، ބަލައިލި ކޮންމެ ދިމާލަކުންމެ ފެންނަނީ ކުރެހުންތެރިން އިތުރު ހިތްވަރަކާއެކު މަސައްކަތް ފަށައިގަންނަ ތަނެވެ. މި ޢާލަމީ ވަބާގެ ބިރުވެރިކަމުގެ ތެރޭގައި ކުރެހުންތެރީންގެ ހިތްގައިމު ކުރެހުންތައް ވެގެންދިޔައީ ހިތްތަކަށް ހަމަޖެހުން ގެނެސްދިން ފަރުވާއަކަށެވެ.