ދިވެހި ފައިސާގެ ނޫޓްތައް ކުރެއްސެވުމުގައި ހިއްސާވެ ވަޑައިގަންނަވާ ސަރުދާރު ދޮންމަނިކު އަވަހާރަވެއްޖެއެވެ.
އޭނާ އަވަހާރަވިއިރު އުމުރުފުޅަކީ 93 އަހަރެއެވެ. މައުލޫމަތު ލިބިފައިވާ ގޮތުގައި ސަރުދާރު ދޮންމަނިކު އަވަހާރަވީ އޭޑީކޭ ހޮސްޕިޓަލްގައި ފަރުވާ ދެމުންދަނިކޮށް ކުއްލި ގޮތަކަށެވެ. ސަރުދާރު ދޮންމަނިކުވަނީ މީގެ ކުރިން ކޯވިޑް ޖެހި ފަރުވާއިން ރަނގަޅުވެފައެވެ. އޭރު އޭނާ ހިމެނުނީ ކޯވިޑް ޖެހުނު މީހުންގެ ތެރެއިން ރާއްޖެއިން އެ ބަލިން ރަނގަޅުވި އެންމެ ދުވަސްވީ މީހުންގެ ތެރޭގައެވެ.
ސަރުދާރު ދޮންމަނިކަކީ ދައުލަތުގެ ނިޝާން ކުރެއްސެވުމުގައި ހިއްސާވެ ވަޑައިގެންނެވި އަދި ކުރީގެ ރައީސް މުހައްމަދު އަމީން ދީދީގެ ވެރިކަމުގައި ދިވެހި ފައިސާގެ ނޫޓްތައް ކުރެއްސެވުމުގެ ޝަރަފު ލިބިވަޑައިގެންފައިވާ ބޭފުޅެކެވެ.
އުމުރުން 25 އަހަރުން ފެށިގެން ކުރެހުމުގެ މަސައްކަތް ކުރައްވަމުން ގެންދެވި ސަރުދާރު ދޮންމަނިކަށް ވަނީ 1996 ވަނަ އަހަރު ކުރެހުމުގެ ރޮނގުން ޤައުމީ އިނާމް ލިބިވަޑައިގެންފައެވެ. އޭނާ ކުރެއްވި މަސައްކަތްތަކުގެ ތެރޭގައި، ބޮޑެތި ތަޞްވީރުތައް ކުރެއްސެވުމާއި، ގިޑިގެ ޑިޒައިން ކުރެއްވުންފަދަ ކަންތައްތައް ހިމެނެއެވެ. މީގެ އިތުރުން، ބޮއްޔާއި، މަހުގެ ކަށްޓާއި، މަހުގެ ހަމުން އެއްޗެތި ހެއްދެވުންވެސް ހިމެނެއެވެ. އަދި ސްޓެންސިލްގައި ކުރަހައިގެން ނޫސް މަޖައްލާ ނެރުނު ދިގު މުއްދަތުގެ ތެރޭގައި ކުރައްސަވާފައިވާ ގިނަ އަދަދެއްގެ ކުރެހުންތައްވެސް ހިމެނެއެވެ. ފަހަކަށް އައިސް ރާއްޖޭގައި ކުރެހުންތެރިން އުފެދިގެން، އެ ކުރެހުންތެރިންގެ މަސައްކަތްތައް ޢާންމުވުމުގެ ކުރީގައި، ގިނަ އަހަރުތަކެއް ވަންދެން މުޅި ރާއްޖޭގައި ހުރި އެންމެ ކުޅަދާނަ އަދި އެންމެ މަޝްހޫރު ކުރެހުންތެރިޔަކީ ސަރުދާރު ދޮންމަނިކެވެ.