މިދިޔަ މާރިޗްމަހު މިޞްރުގެ ސުއޭސް ކެނަލަށް ހުރަސްވި އެވަރގިވަން ބޯޓާއި ގުޅިގެން ބަދަލުދިނުމުގެ މައްސަލާގައި ބޯޓުގެ ވެރިންނާއި މިޞްރު ސަރުކާރުގެ ޙިއްޞާއޮންނަ ސުއޭސް ކެނަލް އޮތޯރިޓީއާ ދެމެދު އެއްބަސްވުމަކަށް އާދެވިއްޖެކަމަށް ދެފަރާތުންވެސް ބުނެފިއެވެ.
މާރިޗް 23ވަނަ ދުވަހު ސުއޭސް ކެނަލަށް ހުރަސްވީ އެވަރގިވަން ބޯޓު، 6 ދުވަސްވަންދެން ކެނަލްގައި ފުންނުކުރެވި އޮތުމަށްފަހު މާރިޗް 29ވަނަ ދުވަހު ވަނީ ފުންކޮށްފައެވެ.
ނަމަވެސް ސުއޭސް ކެނަލް ހިމެނޭ ސަރަޙައްދުގައި އޮންނަ ގްރޭޓް ބިޓަރ ލޭކްގައި މިހާރުވެސް ބާއްވާފައިއޮތް އެވަރގްރީން ބޯޓު ދޫކޮށްލާނީ މި އެއްބަސްވުމާބެހޭ ހުރިހާ ކަމެއް ވީހާވެސް އަވަހަކަށް ނިންމައި އެއްބަސްވުމުގައި ސޮއި ވެސް ކޮށްފައިކަމުގައި ސްޓޭން މެރިންއިން ނެރުނު ބަޔާނެއްގައި ވަނީ ބުނެފައެވެ. ބޯޓުފުންކުރުމަށާއި މިކަމުގެ ސަބަބުން އެސްސީއޭއަށް ލިބުނު ބަދުނާމުގެ ގެއްލުމާއި މީގެއިތުރުން ޢާމްދަނީގެ ގޮތުގައި ލިބުނު ގެއްލުމުގެ ބަދަލުގެގޮތުގައި ސުއޭސް ކެނަލް އޮތޯރިޓީއިން މީގެކުރިން 916 މިލިއަން ޑޮލަރު ދިނުމަށް އެދިފައި ވީނަމަވެސް ފަހުން މި ޢަދަދު ވަނީ 550 މިލިއަން ޑޮލަރަށް ކުޑަކޮށްފައެވެ.
މި ބަދަލާއި މިސްރުގެ ކޯޓު އަމުރަކަށް ބޯޓު ހިފަހައްޓާފައި ބޭވުމުގެ ސަބަބުން ބޯޓުގެ ވެރިޔާ ޖަޕާނުގެ ޝޯއެ ކިސަން އަދި ބޯޓު އިންޝުއަރެންސް ކޮށްފައިވާ ފަރާތާދެމެދު ވަނީ ހިތްހަމަނުޖެހުންތަކެއް އުފެދިފައެވެ. ބޯޓު ހިފަހައްޓާފައި އޮތް އޮތުމުގެ ސަބަބުން އައު ބަދަލެއް ދިނުމާއިމެދު ކޯޓުގައި މިހާރު މަޝްވަރާތަކެއް ކުރިއަށްދާކަމަށް އެސްސީއޭގެ ވަކީލު ޚާލިދު އަބޫބަކުރު ވަނީ ވިދާޅުވެފައެވެ.
ހަ ދުވަސް ވަންދެން ކެނަލްގައި ތާށިވެފައި އޮތް އެވަރގިވަން ބޯޓުގެ ސަބަބުން ދުނިޔޭގެ ކާގޯ ދަތުރުތަކަށްވަނީ ބުރޫ އަރާފައެވެ. މިބޯޓު ފުންކުރަންދެން 100 އަށްވުރެ ގިނަ ބޯޓު މަޑުކޮށްގެން ތިބެންޖެހުމާއި ބައެއް ބޯޓުތަކަށް ގިނަ ޢަދަދެއްގެ ތެޔޮ ޚަރަދުކޮށްގެން އެފްރިކާގެ ދެނުކުން އޮންނަ ދިގު މަގު ކޭޕް އޮފް ގުޑް ހޯޕް ޚިޔާރު ކުރަންޖެހުންފަދަ ގެއްލުންތައް ވަނީ ލިބިފައެވެ.
މިޞްރަށް ބޭރު ފައިސާ ވަންނަ މުހިންމު އެއް މަގު ކަމުގައިވާ މި ކެނަލްއަށް ދުނިޔޭގެ ވިޔަފާރީގެ %10 ވަންނާނެކަމަށް ޚަބަރުތައް ބުނެއެވެ. މިދިޔަ އަހަރު މި ކެނަލްއިން ދަތުރުކުރި ބޯޓުގެ ޢަދަދު 19،000 އަށް އަރާކަމުގައި ރަސްމީ ހިސާބުތަކުން ދައްކައެވެ.