ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ޖަރުމަނުވިލާތުގެ ޤާނޫނު ހަދާ މަޖިލީހުގެ ތިރި ގޭގެ ރައީސް ވުއަލްފްގަންގް ޝުއައިބުލައާ ބައްދަލުކުރައްވައިފިއެވެ.
ޖަރުމަނުވިލާތުގެ ޤާނޫނު ހަދާ މަޖިލީހުގެ ތިރި ގެ ކަމަށްވާ ބުންޑެސްޓާގައި ބޭއްވުނު މި ބައްދަލުކުރެއްވުމުގައި ރާއްޖެއާއި ޖަރުމަނުވިލާތާއި ދެމެދުގައި އޮތް ރަޙުމަތްތެރިކަމުގެ ގުޅުމުގެ މައްޗަށް އަލިއަޅުވާލައްވާ ދެ ބޭފުޅުން ވަނީ ވާހަކަދައްކަވާފައެވެ. އަދި ޖަރުމަނުވިލާތުގެ އިންސްޓިޓިއުޓެއްކަމަށްވާ "މެކްސް ޕްލޭންކް ފައުންޑޭޝަން ފޯރ އިންޓަރނޭޝަނަލް ޕީސް އެންޑް ދަ ރޫލް އޮފް ލޯ"އިން ރައްޔިތުންގެ މަޖިލީހުގެ މެންބަރުންނަށާއި، މަޖިލީހުގެ އިދާރާގެ މުވައްޒަފުންނަށް ފޯރުކޮށްދެއްވަމުން ގެންދަވާ ތަމްރީން ޕްރޮގްރާމްތައް ފާހަގަކުުރައްވާ މަޖިލީހުގެ ރައީސް އެކަމަށް ޝުކުރު އަދާކުރެއްވިއެވެ.
ރައީސް ނަޝީދު ޖަރުމަނުވިލާތުގެ ޤާނޫނު ހަދާ މަޖިލީހުގެ ތިރި ގޭގެ ރައީސްއާއި ބައްދަލުކުރައްވާފައިވާއިރު، އެމަނިކުފާނު ޖަރުމަނުވިލާތަށް ވަޑައިގެންފައިވަނީ މިދިޔަ މޭމަހުގެ 6ވަނަ ދުވަހު އެމަނިކުފާނަށް އަމާޒުކޮށްދިން ޓެރަރިސްޓް ޙަމަލާގައި ލިބުނު ޒަޙަމްތަކަށް އިތުރު ފަރުވާ ހޯއްދެވުމަށެވެ. މި ޙަމަލާގައި އެމަނިކުފާނުގެ ފުރާނަފުޅަށް ނުރައްކާވާވަރުގެ ޒަޙަމްތައް ލިބިވަޑައިގެންފައިވާއިރު، އޭ.ޑީ.ކޭ ހޮސްޕިޓަލުން ފަރުވާ ހޯއްދެވުމަށްފަހު ޖަރުމަނުވިލާތަށް ރައީސް ނަޝީދު ވަޑައިގެންފައިވަނީ މިދިޔަމަހުގެ 13ވަނަ ދުވަހުއެވެ.