ދުނިޔޭ ބާޒާރުގައި ޑޮލަރުގެ އަގު މަތިވުމާއެކު ތެލުގެ އަގު އަނެއްކާވެސް ދަށަށް ހިނގައްޖެއެވެ. ނަމަވެސް ކޯވިޑްގެ އައު ޑެލްޓާ ވޭރިއަންޓް އޭޝިއާގައި، ޚާއްޞަކޮށް ދުނިޔޭގައި ދެވަނައަށް އެންމެ ގިނައިން ތެޔޮ ބޭނުންކުރާ ޗައިނާގައި ފެތުރެމުންދާތީ ތެލަށް އޮތް ޑިމާންޑް އަނެއްކާވެސް ދަށްވެގެން ހިނގައިދާނެ ކަމަށް ކަމާއިބެހޭ މާހިރުން ބުނެއެވެ.
މީގެއިތުރުން ޑޮލަރުގެ އަގު މިދިޔަ ހަފްތާ އުފުލުމާއެކު ތެލުގެ އަގު ވަނީ ދަށަށް ގޮސްފައެވެ. ނަމަވެސް ޑޮލަރު ފިޔަވަފައި އެހެނިހެން ފައިސާ ބޭނުންކުރާ ޤައުމުތަކުގައި ޑޮލަރުގެ އަގު އުފުލުމާއެކު ތެލުގެ އަގުވެސް އުފުލިގެން ދާނެއެވެ. އެގޮތުން ބްރެންޓް ބެންޗްމާރކްގައި ތެލުގެ އަގު މިވަގުތު ހުރީ ފީފާއެއް 69.29 އެމެރިކާ ޑޮލަރަށެވެ. އެމެރިކާގެ ވެސްޓް ޓެކްސަސް އިންޓަރމީޑިއަޓް (ޑަބްލިޔުޓީއައި) ބެންޗްމާރކްގައި ތެލުގެ އަގުހުރީ ފީފާއެއް 66.96 އެމެރިކާ ޑޮލަރަށެވެ.
ކޯވިޑުގެ އައު ޑެލްޓާ ވޭރިއަންޓްގެ ސަބަބުން ޗައިނާގައި އަޅާފައިވާ ރައްކާތެރިކަމުގެ ފިޔަވަޅުތަކާއި ހެދި ތެލުގެ ޑިމާންޑު ދަށްވާނެ ކަމަށް ކަމާބެހޭ މާހިރުން ދެކެއެވެ. ވައިރަހުން ރައްކާތެރިވުމަށް ޗައިނާގައި އަޅާފައިވާ ފިޔަވަޅުތަކުގެ ތެރޭގައި ފްލައިޓްތައް ކެންސަލް ކުރުމާއި، 46 ޤައުމަކަށް ދަތުރު ނުކުރެވުމާއި އަދި އެންމެ ބޮޑަށް އަސަރުކޮށްފައިވާ ސަރަޙައްދުތަކުގައި އާންމު ދަތުފަތުރުތަކާއި ޓެކްސީ ޚިދުމަތް ދިނުން ބަންދުކުރުންވެސް ހިމެނެއެވެ.
ކޯވިޑްގެ ބަލިމަޑުކަމާއި ފެންބޮޑުވުމުގެ ސަބަބުން ޖުލައި މަހު ޗައިނާއިން މުދާ ބޭރުކުރި މިންވަރު ވަނީ ލަފާކުރިވަރަށްވުރެވެސް ދަށަށްގޮސްފައެވެ. މީގެ އިތުރުން އުފެއްދުންތެރިކަމުގެ ޞިނާޢަތް ވެސް ދަށްވެ އެ ޤައުމަށް މުދާ އެތެރެކުރި މިންވަރުވެސް ވަނީ ލަފާކުރިވަރަށްވުރެ ދަށްވެފައެވެ.
އެގޮތުން ޖޫންމަހު ޗައިނާއަށް އެތެރެކޮށްފައިވަނީ 9.71 މިލިއަން ފީފާގެ ތެލެވެ. އަދި މިއީ 10 މިލިއަނަށްވުރެ މަދުން ޖެހިޖެހިގެން ޗައިނާއަށް ތެޔޮ އެތެރެކުރާ 4 ވަނަ މަސްވެސް މެއެވެ. ތެލުގެ އަގު މިވަގުތަށް ދަށްވެފައި އޮތްނަމަވެސް އޮގަނައިޒޭޝަން އޮފް ދަ ޕެޓްރޯލިއަމް އެކްސްޕޯޓިންގ ކަންޓްރީޒް (އޯޕެކް) ން ބާޒާރަށް ނެރޭ ތެލުގެ މިންވަރު އިތުރުކޮށްފައިވުމާއިއެކު ޑިމާންޑް އުފުލިގެންދާ ވަގުތު ބޭނުންވާވަރަށް ބާޒާރުން ތެޔޮ ލިބޭނެކަމަށް މާހިރުން އުންމީދުކުރެއެވެ.