ޠާލިބާނުން އަފްޣާނިސްޠާނުގެ ކޮންޓްރޯލް ނެގުމާއި ގުޅިގެން އެ ޤައުމުގެ ބޯޑަރުތަކާއި ބޭންކުތައް ބަންދުކުރުމުގެ ސަބަބުން އިންޑިއާއާއި އަފްޣާނިސްޠާނުގެ ވިޔަފާރިތަކަށް ބުރޫއަރައިފިއެވެ.
ޙަބަރުތައް ބުނާގޮތުން ބޯޑަރުތަކާއި ބޭންކުތައް ބަންދުކުރުމުގެ ސަބަބުން ދެ ޤައުމުގެ ދެމެދުގެ ބަދަލުކުރާ ޝިޕްމަންތްތަކަށް ބުރޫއަރައި ޝިޕްމަންޓްތައް ފޯރޮކޮށްދިނުމުގައި ވަނީ ލަސްތަކެއް ދިމާވެފައެވެ.
ތަފާސް ހިސާބުތައް ދައްކާގޮތުން ނިމުނު ފިސްކަލް އަހަރު އިންޑިއާއިން ވަނީ 826 މިލިއަން އެމެރިކާ ޑޮލަރުގެ މުދާ އަފްޣާނިސްޠާނަށް އެކްސްޕޯޓްކޮށްފައެވެ. މީގެތެރޭގައި މައިގަނޑު ގޮތެއްގައި ހިމެނެނީ ހަކުރު، ސީރިއަލް، ސައިފަތް، ހަވާދު، ފާމަސޫޓިކަލް އަދި ޓެކްސްޓައިލްގެ އުފެއްދުންތަކެވެ. އަދި އަފްޣާނިސްޠާނުން އިންޑިއާއަށް ވަނީ 509 މިލިއަން އެމެރިކާ ޑޮލަރުގެ މުދާ އެކްސްޕޯޓްކޮށްފައެވެ. ވައްޠީނި، ހިކި މޭބިސްކަނދުރު އަދި އާފަލަކީ މިގޮތުން މައިގަނޑު ގޮތެއްގައި އަފްޣާނިސްޠާނުން އިންޑިއާއަށް އެކްސްޕޯޓްކުރާ މައިގަނޑު އުފެއްދުންތަކެވެ.
މިދިޔަ އަހަރާއި މިއަހަރުވެސް އިންޑިއާއިން ދެވަނަ އަށް އެންމެ ގިނައިން ހަކުރު ގަނެފައިވަނީ އަފްޣާނިސްޠާނުންނެވެ. މިގޮތުން އަފްޣާނިސްޠާނުން ވަނީ 624000 ޓަނުގެ ހަކުރު ގަނެފައިކަމަށް އޯލް އިންޑިއާ ޝުގަރ ޓްރޭޑް އެސޯސިއޭޝަނުން ބުނެއެވެ.
ހަކުރާއި އެނޫންވެސް އުފެއްދުންތަކަށް އަފްޣާނިސްޠާނުގައި ބޮޑު ޑިމާންޑެއް އޮތުމާއިއެކު އެ ޤައުމުގެ ބޭންކުތައް ހުޅުވާލިހާ އަވަހަކަށް މުދާ އެތެރެކުރުންވެސް ފެށޭނެކަމަށް ކަރާޗީގައި ހުންނަ ސީޓްރޭޑް ގްރޫޕްގެ ޑިރެކްޓަރ ޠައްޔިބު ބަލަގްވަމްގާލާ ވިދާޅުވިއެވެ. އަދި މުދާއެތެރެކުރުމަށް ދައްކަންޖެހޭ ޓެކްސް ތާލިބާނުން ކުޑަކޮށްފައި އޮތުމުގެ ސަބަބުން މުދާ އެތެރެކުރާ މިންވަރު އިތުރަށް އިތުރުވެގެންދާނެކަމަށްވެސް އޭނާ ވިދާޅުވިއެވެ.
އިންޑިއާއިން އަފްޣާނިސްޠާނަށް ދާ ޝިޕްމެންޓްތައް އާންމުގޮތެއްގައި މަޑުކުރާނީ ޕާކިސްތާނުގެ ކަރާޗީ ބަނދަރުގައެވެ. އަދި އޭގެފަހުން އެއްގަމުމަގުން އަފްޣާނިސްޠާނަށް ޝިޕްމެންޓްތައް ގެންދެއެވެ.
އިންޑިއާއިން ވަނީ މީގެކުރިންވެސް އަފްޣާނިސްޠާނުގައި ޠާލިބާނުން ވެރިކަން ކުރިއިރު ވިޔަފާރީގެ މުޢާމަލާތްތައް ހިންގާފައެވެ.