ދިވެހިންނަށް ވީޒާއާ ނުލާ އިންޑިއާއަށް ދަތުރުކުރެވޭނެ ގޮތް ހަމަޖައްސައިފިއެވެ.
ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން ކުރެއްވި ޓުވީޓެއްގައި ވިދާޅުވީ، އަންނަ ހުކުރު ދުވަހުން ފެށިގެން ދިވެހިންނަށް ވިޒާއާ ނުލާ އިންޑިއާއަށް ދަތުރުކުރެވޭނެ އިންތިޒާމް މިހާރު ހަމަޖައްސާފައިވާކަމަށެވެ. އެގޮތުން ބޭސްފަރުވާއަށާއި، ވިޔަފާރިއާއި ފަތުރުވެރިކަމުގެ ބޭނުންތަކަށް އިންޑިއާއަށްދާ ދިވެހިންނަށް މިމަހުގެ 15 ވަނަ ދުވަހުން ފެށިގެން ވިޒާއާ ނުލާ އެ ޤައުމަށް ދަތުރުކުރެވޭނެކަމަށް އިންޑިއާ ހައިކޮމިޝަނުން ވިދާޅުވެއެވެ.
✅NO VISA required fm Oct 15 for Maldivians travelling to India for Medical,Business & Tourism purposes.
— India in Maldives (@HCIMaldives) October 10, 2021
?? will be the 1st beneficiary of VISA FREE TRAVEL since COVID restrictions were imposed by ?? in Mar 2020.
This move restores the bilateral visa-free agreement of Dec 2018. pic.twitter.com/VkVwGyCvQ1
މިއީ ކޯވިޑް-19އާ ގުޅިގެން އިންޑިއަށް ދަތުރުކުރުމުގައި މިދިޔަ އަހަރުގެ މާރިޗުމަހުގެ ތެރޭގައި އަޅާފައިވާ ރައްކާތެރިކަމުގެ ފިޔަވަޅުތަކަށްފަހު، "ވިސާ ފްރީ ޓްރެވަލް" ނުވަތަ ވިސާއާ ނުލާ އެ ޤައުމަށް ދަތުރުކުރުމުގެ ފުރުޞަތު ޤައުމަކަށްދިން ފުރަތަމަ ފަހަރެވެ. އަދި މި ފުރުޞަތާއެކު ރާއްޖެއާއި އިންޑިއާ ދެމެދު 2018 ވަނަ އަހަރު ވެފައިވާ ބައިލެޓްރަލް ވިސާ ފްރީ އެގްރީމަންޓަށް އަލުން އިޢާދަކުރެވިގެންދާނެކަން އިންޑިއާ ހައިކޮމިޝަނުން ފާހަގަކުރައްވައެވެ.
އިންޑިއާއަށް ބޭސްފަރުވާއަށް ދާން ބޭނުންވާ ދިވެހިން ވިސާ ހޯދުމުގައި ވަނީ ވަރަށް ބޮޑަށް ދަތިވެފައެވެ. އެގޮތުން ވިސާ ހޯދުމަށް އިންޑިއާ ހައިކޮމިޝަން ކައިރީގައި ކޮންމެ ދުވަހަކުވެސް ބޮޑު ކިއުއެއް އޮވެއެވެ. އިންޑިއާއިން ހަމަޖައްސައިދިން އިންތިޒާމާއެކު ދިވެހިންނަށް އިންޑިއާއަށް ދަތުރުކުރުމުގައި އިތުރު ވަރަށް ބޮޑު ފަސޭހަތަކެއް ލިބިގެންދާނެއެވެ. ދިވެހިން ބޭސް ފަރުވާއަށް އެންމެ ގިނައިން ދާ ޤައުމަކީ އިންޑިއާއެވެ.
ރައީސުލްޖުމްޙޫރިއްޔާ އިބްރާޙީމް މުޙައްމަދު ޞާލިޙު 2018 ވަނަ އަހަރު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިން ދެ ޤައުމުގެ ދެމެދުގައި ވަނީ ބައިލެޓްރަލް ވިސާ ފްރީ އެގްރީމަންޓެއްގައި ސޮއިކުރައްވާފައެވެ.
މި އެއްބަސްވުމުގެ ދަށުން ވިޔަފާރި އާއި ޓޫރިޒަމް އަދި ބޭސްފަރުވާ ދަތުރުތަކަށް 90 ދުވަހުގެ ވިސާ ލިބޭނެއެވެ. އަދި ޓޫރިސްޓް ވިސާގައި ހުއްޓައި ކުއްލި ޞިއްޙީ ޙާލަތެއް މެދުވެރިވެއްޖެނަމަ ރާއްޖެ ނައިސް މެޑިކަލް ވިސާއަށް ބަދަލުކުރުމާއި، ދިގު މުއްދަތަކަށް ބޭސްކުރަން ޖެހޭ ހާލަތްތަކުގައި ހާލަތަށް ބަލައި ދެ އެހީތެރިންނާއެކު އެއް އަހަރު ދުވަހަށް ވިސާ ދޫކުރުން ހިމެނެއެވެ. އަދި މަލްޓިޕަލް އެންޓްރީ ސްޓޫޑަންޓް ވިސާ ޖަހައިދިނުމާއި، 18 އަހަރުން ދަށުގެ ދަރިވަރުންގެ ބެލެނިވެރިންނަށްވެސް މަލްޓިޕަލް އެންޓްރީ ވިސާ ދޫކުރުމުގެ އިތުރުން، މަތީ ތައުލީމް އުގެނޭ ދަރިވަރުންގެ ދަރިން 18 އަހަރަށްވުރެ ހަގު ނަމަ، އަނބިންނާއި ފިރިންނާއި މައިންބަފައިންނަށްވެސް ވިސާ ދޫކުރުމަށް ހަމަޖެހިފައިވެއެވެ.
އަންނަ ހުކުރު ދުވަހުން ފެށިގެން ދިވެހިންނަށް ވިޒާއާ ނުލާ އިންޑިއާއަށް ދަތުރުކުރެވޭނެ އިންތިޒާމް ހަމަޖައްސާފައި މިވަނީ، އިންޑިއާ ވިސާ ހޯދުމުގައި ދިވެހިންނަށް ހުރި ދަތިތަކަށް އަވަސް ހައްލެއް ލިބޭނެކަމުގެ ޔަޤީންކަން ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު އިއްޔެ ދެއްވާފައިވަނިކޮށެވެ.