ޖީ7 ޤައުމުތަކާއި ޔޫރަޕް އިއްތިހާދު އަދި އޮސްޓްރޭލިއާ ހިމެނޭ ގޮތަށް ރަޝިއާގެ ތެލުގެ އަގު ކޮންޓްރޯލުކުރުމުން، ތެޔޮ އުފައްދާ މިންވަރު މަދުކޮށްފާނެ ކަމަށް ރަޝިއާގެ ރައީސް ވުލަޑްމިއަރ ޕުޓިން ވިދާޅުވެއްޖެއެވެ. ފުޓިން ވަނީ ރަޝިއާގެ ތެލަށް އަގު ކަނޑައެޅުމުގައި ބައިވެރިވި ގައުމުތަކަށް ތެޔޮ ނުވިއްކާނެ ކަމަށްވެސް ވިދާޅުވެފައެވެ.
އީޔޫ، ޖީ-7 އަދި އޮސްޓްރޭލިއާއިން މިދިޔަ ހަފްތާ ނިންމާފައި ވަނީ ކަނޑުމަގުން ރަޝިއާއިން ޔޫރަޕަށް އެތެރެކުރާ ތެޔޮ ފީފާއެއް 60 ޑޮލަރަށް ވުރެ ބޮޑު އަގެއްގައި ނުގަތުމަށެވެ.
"އަޅުގަނޑުމެންގެ ރިއެކްޝަނަށް ބަލާއިރު، އަޅުގަނޑު ކުރިންވެސް ދަންނަވާފައި އޮންނާނީ މިފަދަ ނިންމުންތައް ނިންމާ ގައުމުތަކަށް ތެޔޮ ނުވިއްކާނަން،" ބިޝްކެކްގައި ނޫސްވެރިންނާ ވާހަކަ ދައްކަވަމުން ޕުޓިން ވިދާޅުވިއެވެ. ނަމަވެސް ބޭނުންވެއްޖެ ނަމަ އެގައުމުތަކަށް ތެޔޮ ވިއްކަން ވިސްނަވާނެކަމަށާއި، ތެޔޮ އުފެއްދުން މަދުކުރުމުގެ މަސައްކަތް ކުރަމުން އަންނަ ކަމަށްވެސް ޕުޓިން ވިދާޅުވިއެވެ.
ރަޝިއާ ހިމެނޭ ގޮތަށް އޮންނަ އޮގަނައިޒޭޝަން އޮފް ޕެޓްރޯލިއަމް ކަންޓްރީޒް، އޯޕެކާއި އެކު ރަޝިޔާއިން އެއްބަސްވުމެއް އޮތް ކަމަށާއި، އެހެންކަމުން މިފަދަ ހަރުކަށި ފިޔަވަޅެއް އެޅުމަކީ ހަމައެކަނި ވެދާނެ ކަމެއްކަމަށް ޕުޓިން ވިދާޅުވިއެވެ. އަދި ހުޅަނގުގެ އަގު ކަނޑައެޅުމުން މޮސްކޯއަށް ގެއްލުމެއް ނުލިބޭނެ ކަމަށްވެސް ޕުޓިން ވިދާޅުވިއެވެ. އޭނާ ވިދާޅުވީ ހުޅަނގުގެ މި ފިޔަވަޅަކީ "މޮޔަ" ފިޔަވަޅެއް ކަމަށާއި، އަގުތައް ކަނޑައެޅި ގައުމުތަކަށް ހަކަތައިގެ އަގު ވަރަށް ބޮޑަށް އުފުލޭނެ ކަމަށެވެ.
ތެލުގެ އަގު ކަނޑައެޅުމަށް ޖީ7އިން ހުށަހެޅީ މިދިޔަ ސެޕްޓެމްބަރު މަހުގެ ތެރޭގައެވެ. އަދި އެ ފިޔަވަޅަކީ ތެޔޮ އެކްސްޕޯޓުކުރުމުން މޮސްކޯއަށް ފައިދާވުން ހުއްޓުވައި އަގު އުފުލިގެން ދިއުން ކޮންޓްރޯލްކުރުމަށް އެޅި ފިޔަވަޅެކެވެ. މިކަމުގެ ސަބަބުން ރަޝިޔާއަށް ބޮޑު އަގުގައި ތެޔޮ ވިއްކުމަށް ދަތިތަކެއް ކުރިމަތިވެދާނެކަމަށް ވަނީ ބެލެވިފައެވެ. އެއީ ބޮޑެތި ޝިޕިން އަދި އިންޝުއަރެންސް ކުންފުނިތަކަކީ ޖީ7ގެ ތެރޭގައި ހިމެނޭ ކުންފުނިތަކަށްވާތީއެވެ.
ރަޝިއާގެ ތެލަށް އަގު ކަނޑައެޅިއިރު، ދުވާލަކު 2 މިލިއަން ފީފާ ތެޔޮ ނޮވެމްބަރު މަހުން ފެށިގެން މަދުކުރާ ގޮތަށް އޮތް އުސޫލަށް ޢަމަލު ކުރަމުން ގެންދިއުމަށް އޯޕެކުން ވަނީ ނިންމާފައެވެ.
ނޮވެމްބަރު މަހުން ފެށިގެން ދުވާލަކު ދެ މިލިއަން ފީފާގެ ތެޔޮ މަދުކުރުމަށް، އޯޕެކާއި ރަޝިއާ ހިމެނޭ، އޯޕެކް ޕްލަސްއިން އޮކްޓޫބަރު މަހު ރިޔާޟްގައި ބޭއްވި ބައްދަލުވުމުން ވަނީ ނިންމާފައެވެ. މިއީ 2020 ވަނަ އަހަރު ކޯވިޑުގެ ބަލިމަޑުކަމަށްފަހު ތެޔޮ އުފައްދާ މިންވަރު އެންމެ ބޮޑަށް ދަށްކުރި ކުރުމެވެ.