އިހުމާލުން ސްޓެލްކޯ ކޭބަލަކަށް ގެއްލުންވެއްޖެ ނަމަ ފިޔަވަޅުއަޅަނީ

މަގުކޮންނަ ފަރާތުގެ އިހުމާލުން ކަރަންޓު ކޭބަލަކަށް ގެއްލުންވެއްޖެ ނަމަ، ކޭބަލް މަރާމާތު ކުރުމަށް ދާ ޚަރަދު އެފަރާތަކުން ހޯދުމަށް ނިންމާފައިވާ ކަމަށް، ސްޓެލްކޯއިން ވިދާޅުވެއްޖެއެވެ.

ސްޓެލްކޯއިން މިކަން ހާމަކޮށްފައިވަނީ މިފަހަކަށް އައިސް މަގުކޮނުމުގެ ތެރޭގައި އެކުންފުނީގެ ކަރަންޓު ވިއުގާގައި ހިމެނޭ ކޭބަލްތަކަށް ގެއްލުންވެ އެކި ސަރަހައްދުތަކުން ކަރަންޓު ކެނޑުން އިތުރުވެފައިވުމާއި ގުޅިގެން އަޅާ ފިޔަވަޅެއްގެ ގޮތުންނެވެ.

ސްޓެލްކޯއިން މީސްމީޑިއާގައި ހިއްސާކޮށްފައިވާ ޕޯސްޓެއްގައި ވިދާޅުވީ، މަގު ކޮނުމުގެ އެކި މަސައްކަތްތަކުގެ ތެރެއިން އެކުންފުނީގެ ކަރަންޓު ވިއުގާގައި ހިމެނޭ ކޭބަލްތަކަށް ގެއްލުންވެ، ކަރަންޓު ޚިދުމަތް މެދުކެނޑުމުގެ ސަބަބުން ރައްޔިތުންނަށް އެތަކެއް ތަކުލީފުތަކާއި ދިތަތައް ދިމާވަމުންދާ ކަމަށެވެ. އަދި މިފަދަ ހާދިސާތައް ދުވަހެއް ދުވަހަށް އިތުރުވަމުން ދިއުމާއި އެކު، މަގު ކޮނުމުގެ މަސައްކަތްތައް ކުރިއަށްގެންދާ ފަރާތްތަކުގެ އިހުމާލުން މިފަދަ ކަމެއް ދިމާވެއްޖެ ހާލަތެއްގައި އެފަރާތެއް ޒިންމާދާރު ކުރުވުމަށް ނިންމާފައިވާ ކަމަށެވެ.

މިގޮތުން ކަރަންޓު ކޭބަލަށް ގެއްލުންވީ މަގުކޮންނަ ފަރާތުން ބަލަން ޖެހޭ ވަރަށް ނުބަލާ މަސައްކަތް ކުރިއަށް ގެންދިއުމުން ނުވަތަ އިހުމާލުން ކަމަށްވާނަމަ، އެ މައްސަލަ ހައްލުކޮށް އަލުން ހިދުމަތްދޭން ހިނގާ ހަރަދު އެ ފަރާތެއްގެ އަތުން ނެގުމަށް ނިންމާފައިވާ ކަމަށް ސްޓެލްކޯއިން ވިދާޅުވިއެވެ.

ސްޓެލްކޯއިން ވިދާޅުވީ މި ނިންމުމަކީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަޤުސަދުގައި ނިންމާފައިވާ ނިންމުމެއް ކަމަށެވެ. އަދި މަގު ކޮނުމުގެ އެންމެހާ މަސައްކަތްތައް ކުރިއަށްގެންދަވާ ހުރިހާ ފަރާތްތަކުންވެސް ސްޓެލްކޯގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް އެކުންފުނިން ވަނީ އިލްތިމާސްކޮށްފައެވެ.

އިމާރާތް ކުރުމާއި، މަގު ހެދުމުގެ މަސައްކަތް ކުރުމަށް މާލެއާއި ހުޅުމާލެ ހިމެނޭހެން އެކި ސަރަހައްދުގައި އެކި ފަރާތްތަކުން މަސައްކަތް ކުރަމުންދެއެވެ. މިގޮތަށް މަސައްކަތް ކުރާއިރު، ކަރަންޓު ކޭބަލްތަކަށް ގެއްލުންވެއެވެ. މިމައްސަލަ ހައްލުކުރުމަށް ފުރަތަމަ ކަރަންޓު ކޭބަލަށް ގެއްލުން ލިބުނު ސަރަހައްދު ފާހަގަކުރަންޖެހެއެވެ. އަދި މަރާމާތަށްވެސް ވަގުތު ހޭދަވާއިރު، އެ ކޭބަލެއް ގުޅިފައިވާ ސަރަހައްދުން ގިނަ އިރުތަކަކަށް ކަރަންޓު ކެނޑިފައި އޮވެއެވެ. މިކަމާއި ގުޅިގެން މީގެ ކުރިންވެސް ސްޓެލްކޯއިން ވަނީ ކޭބަލަށް ގެއްލުންނުވާނެހެން މަސައްކަތް އިންތިޒާމު ކުރުމަށް އިލްތިމާސްކޮށްފައެވެ.