ޒޯން ޗެމްޕިއަންޝިޕުގެ އެންމެ އަވަސް ގޯލު ޖެހި ކުޅުންތެރިއަކަށް ނިހާލް

އެފްއޭއެމް ފުޓްސަލް ޒޯން ޗެމްޕިއަންޝިޕުގައި އެންމެ އަވަސް ލަނޑުޖެހި ކުޅުންތެރިޔާގެ ރެކޯޑު، ކަނޑިތީމުގެ ހުސެއިން ނިހާލް ހޯދައިފިއެވެ.

އޭނާ މި ރެކޯޑު ހެދީ ނޯތު ޒޯން 1ގައި ކަނޑިތީމާއި ހަނިމާދޫ ބައްދަލުކުރި މެޗުގައި ޖެހި ފުރަތަމަ ލަނޑާއެކުއެވެ.

2-6ގެ ނަތީޖާއަކުން ކަނޑިތީމު މޮޅުވި މި މެޗުގައި ނިހާލް ލަނޑުޖެހީ 34ވަނަ ސިކުންތުގައެވެ.

މި ރެކޯޑު ހެދުމުގެ އިތުރުން މެޗުގައި ކަނޑިތީމުން ޖެހި ހަ ލަނޑުގެ ތެރެއިން ތިން ލަނޑު ކާމިޔާބުކޮށްދީ ނިހާލް ވަނީ ހެޓްރިކް ހަދާފައެވެ. ޒޯން ޗެމްޕިއަންޝިޕުގައި 12 މެޗު ކުޅެފައިވާއިރު އަދި އެހެން އެއްވެސް ކުޅުންތެރިއަކަށް ހެޓްރިކް ހެދިފައެއް ނުވެއެވެ.

ނިހާލް އެޓީމަކަށް ނިސްބަތްވާ ކަނޑިތީމުން މިހާތަނަށް މުބާރާތުގައި ދެ މެޗު ކުޅެފައިވާއިރު ދެވަނަ މެޗުގައި ފިއްލަދޫއާ ދެކޮޅަށް ކުޅެ ކަނޑިތީމު ވީ އެއްވަރެވެ.

ކަނޑިތީމު ހިމެނެނީ ނޯތު ޒޯން1 ގައި ނައިވާދޫ، އިހަވަންދޫ، ފިއްލަދޫ އަދި ހަނިމާދޫއާ އެކުއެވެ. ފަސް ޓީމުން ވާދަކުރާ މި ޒޯނުގެ ޗެމްޕިއަނުން ކަނޑައަޅާނީ ރައުންޑް ރޮބިން އުސޫލުން ކޮންމެ ޓީމެއް، ކޮންމެ ޓީމަކާ ކުޅުމަށްފަހު އެންމެ ރަނގަޅު ނަތީޖާއެއް ހޯދާ ދެޓީމުގެ މެދުގައި ފައިނަލް މެޗެއް ކުޅެގެންނެވެ.